"AccessBank" və "ASAN Könüllüləri" AİM layihəsinə yekun vurub

Sonuncu tədbir Bakının Binəqədi rayonunda yerləşən 276 saylı orta məktəbdə keçirilib. Tədbirdə 200-dən çox 9-11 sinif şagirdləri iştirak edib ki, onlara ixtisas seçimi, müasir və innovativ texnoloji yeniliklər, sosial şəbəkələrdən faydalı istifadə, dünya trendlərinə düzgün qoşulma, yaradıcı, məntiqi təfəkkürün inkişaf etdirilməsi, özünüinkişaf mövzularında təlimlər keçirilib.

Tədbiri giriş sözü ilə açan "AccessBank"ın Korporativ bankçılıq/Marketinq departamentlərinin direktoru Günay Cəlilova bildirib ki, bu layihənin keçirilməsində əsas məqsəd şagirdlərə ixtisas seçimində dəstək olmaq, onları yeni trendlərlə tanış etməklə yanaşı, qarşıya düzgün məqsədin qoyulması və ona çatmaqda motivasiya verməkdir. İndiyədək ölkənin 6 bölgəsində analoji təlimlərin keçirildiyini deyən departament rəhbəri əlavə edib ki, layihə ümumilikdə 2000-dən çox şagirdi əhatə edib: "Bir aydan çoxdur sevə-sevə reallaşdırdığımız layihənin sonuna çatdıq. Bu müddət ərzində ölkənin bölgələrini qarış-qarış gəzərək ixtisas seçimi astanasında olan şagirdlərlə ünsiyyət zamanı anladıq ki, bizim doğrudan da işıqlı gələcəyimiz var. Məhz bunun nəticəsində işimizdən daha çox zövq aldıq. Gələcəyə, yəni siz gənclərə yatırım etmək bizim üçün olduqca vacibdir və bu işi sevə-sevə davam etdirəcəyik".

Daha sonra təlimlərə start verilib. Təlimləri "AccessBank" və "ASAN Könüllüləri" təşkilatının nümayəndələri aparıblar.

Ardınca təlimlərdə iştirak edən şagirdlərin sualları cavablandırılıb. Təlimlərə maraq olduqca böyük idi və bunun nəticəsi kimi, şagirdlərin əksəriyyəti aktivliyi ilə seçilirdi.

Yekunda şagirdlərə hədiyyələr və trenddə olan kitablar paylanılıb.

Xatırladaq ki, aprel ayının 5-dən etibarən start götürən təlimlər Şirvan, Sabirabad, Masallı, Cəlilabad, İsmayıllı, Qəbələ rayonlarında keçirilib.