Report xəbər verir ki, hadisə zamanı maşında bir ailənin üç üzvü olub.

Hadisə zamanı ana və övladı - 1999-cü il təvəllüdlü Hümbətzadə Məsumə Bəhruz qızı və 6 aylıq övladı Hümbətzadə Selcan Oruc qızı xilasedicilər tərəfindən sudan çıxarılaraq xəstəxanaya yerləşdirilib.

Yaralılar DYP əməkdaşlarının xidməti maşını ilə Ağdaş Rayon Mərkəzi Xəstəxanasına aparılıb. Onların hər ikisi xəstəxananın Reanimasiya şöbəsinə yerləşdirilib.

Maşını idarə edən ailə başçısı Hümbətzadə Orucu vaxtında sudan çıxartmağın mümkün olmadığı bildirilir.

Qəzaya düşən ailə üzvləri Naxçıvan şəhər sakinləridirlər. Hadisə onlar Bakıdan Qazaxa gedən zaman baş verib.

Qeyd edək ki, Oruc Mehbalı oğlu Hümbətzadə İmişli rayon Prokurorluğunun müstəntiqi vəzifəsində çalışıb.

***

Kanala düşən maşındakı sərnişinləri polislər xilas edib.

Bununla bağlı Avtosfer.az-ın yaydığı məlumatda bildirilir ki, 18:30 radələrində 99 YP 882 dövlət nomrə nişanlı patrul avtomobili ilə xidmət aparan Ruslan Həsənov və Natiq Hüseynov Bakıdan Gəncə istiqamətinə hərəkət edərkən idarəetməni itirərək təxminən yoldan 40-50 metr aralıda su kanalına düşən "Mersedes” markalı avtomobili görüblər. Bakı istiqamətində hərəkətdə olduqları üçün tez avtomobili saxlayaraq yolun ayırıcı dəmir hissələrindən keçən inspektorlar hadisə yerinə qaçıblar. Qadın və qucağındakı 6 aylıq körpəsini son anda xilas edib, sudan çıxardıqdan sonra yenidən hadisə yerinə qayıdan polislər sol yanı üstə düşmüş və yarıyadək lilə batmış avtomobildə qalan sürücünün boğularaq öldüyünü görüblər.

YPX əməkdaşları körpə və anasını təcili olaraq başqa bir avtomobilə əyləşdirərək xəstəxanaya çatdırılmasını təmin ediblər. Nəticədə ana və uşaq salamat qalıb.