Mingəçevirdə kranlardan palçıqlı su gəlir

Cəmiyyət 13-09-2017 09:57
Mingəçevirdə kranlardan palçıqlı su gəlir
Mingəçevirdə 5 yüzdən artıq ailənin yaşadığı şəhərciyə verilən su içmək üçün yararsızdır. Sakinlər bu suyun içməli yox, texniki su olduğunu iddia edirlər.
Xəzər TV xəbər verir ki, sakinlərin sözlərinə görə, evlərə gələn su həm rənginə, həm də dadına görə içməli sudan fərqlənir.

Ağdamdan məcburi köçkün olan sakinlər suyu süzdükdən sonra içə bildiklərini deyirlər.

10 ədəd doqquzmərtəbəli binanın yerləşdiyi şəhərciyə içməli su anbara toplanaraq nasoslar vasitəsilə verilir. 5 il öncə istifadəyə verilən şəhərciyin sakinləri bildirirlər ki, bu su içmək üçün yox, suvarma üçün yararlıdır. Çirklənməyə əsas səbəb kimi isə anbarın təmizlənməməsini göstərirlər.

Məsələ ilə bağlı "Azərsu" Açıq Səhimdar cəmiyyətinin mətbuat xidmətinin rəhbəri Anar Cəbrayıllı bildirib ki, qurum 2011-ci ildən Mingəçevir şəhərinin dövlət hesabına su təchizatı və kanalizasiya sisteminin yenidən qurulması layihəsinə başlayıb və bu məqsədlə yeni su şəbəkəsi tikilərək istifadəyə verilib . Buna baxmayaraq, şəhərin bir hissəsi, həmçinin məcburi köçkünlərin yaşadığı bu qəsəbədə köhnə mənbədən su alındığı üçün bu vəziyyət yaranıb. Bununla belə, Prezidentin sərəncamına əsasən, artıq problemin qarşısını almaq üçün işlərə başlanılıb.

Bütün işlərin isə bu ilin sonuna kimi başa çatdırılması nəzərdə tutulur.


www.anews.az