İstiPress-in məlumatına görə, Ermənistan prezidenti BMT tribunasından çıxış edərək üzv dövlətlərə BMT-nin əsas prinsiplərindən biri olan ərazi bütövlüyü və sərhədlərin toxunulmazlığını prinsipini arxa plana keçirməyə, yalnız xalqların öz müqədərratını müəyyən etmək prinsipinə əsaslanmağa çağırırdı.
Sarkisyan çıxışında özü də etiraf edib ki, indiyə kimi 4 dəfə eyni məzmunda BMT kürsüsündən çıxış edib və 19 sentyabr 2017-ci ildə etdiyi bu çıxışı 5-cidir. Amma göründüyü kimi, beynəlxalq birlik onun bu cür qeyri-adekvat, əsassız və beynəlxalq hüquqazidd yalvarışını qəbul etməyib.
Ermənistanın ən yaxın, hətta sərhədlərini və hava məkanını təhvil verdiyi tərəfdaşı Rusiya belə Dağlıq Qarabağı müstəqil subyekt kimi tanımayıb. Çünki Helsinki Xartiyasına görə, Dağlıq Qarabağın statusunun dəyişdirilməsi üçün nəzərdə tutulan istənilən addıma - referenduma və s.-ə Azərbaycan icazə verməlidir. Məhz buna görədir ki, ATƏT-in Minsk qrupunda Ermənistana havadarlıq edən həmsədr ölkələr - Rusiya, ABŞ və Fransa münaqişənin həllini öz nəzarətlərinə götürüb Madrid prinsipləri adlı uzun müddətli diplomatik vaxt öldürməni icad edəndən sonra həmişə Azərbaycanı Dağlıq Qarabağın statusu ilə bağlı referendum keçirməyə razı salmağa çalışıb.
Çünki ermənilərin tələbi tamamilə məntiqsizdir - birincisi, erməni xalqı bir dəfə öz müqəddəratını təyin edib və Ermənistan yaranıb. BMT forumunda bütün dünya ermənilərinin adından yalvaran Sarkisyan özü də bilmədən ermənilər üçün ikinci dövlət istədiyini dilə gətirdi. İkincisi, əgər Qarabağ erməniləri hətta ayrı xalq olsaydılar belə, heç bir beynəlxalq qurum onlara görə ərazi bütövlüyü prinsipini pozmayacaq - dünyada 5 min xalq var və onlar cəmi 200 dövlətdə yaşayırlar. Yəni, müasir dünyada dövlətçilik məsələsi etnik məsələ deyil, bir neçə xalq bir dövlətin tərkibində müstəqil yaşaya bilir.
Azərbaycanın mövqeyi bu məsələdə aydındır - ermənilər və onların havadarları olan supergüclər - Rusiya, Fransa və müəyyən mənada ABŞ Qarabağ münaqişəsinin həlli üçün hərbdən başqa yol qoymurlar. Bu yolda təbii ki, Azərbaycanın birinci mübarizə meydanı diplomatik sahə olmalıdır və rəsmi Bakı bunu edir, artıq BMT Təhlükəsizlik Şurasında Ermənistanın işğalçı olduğunu sübut edən 4 qətnamə qəbul edilib. İndi keçirilən 72-ci sessiyada isə Gürcüstan, Türkiyə və Azərbaycan birlikdə Gürcüstanın və Azərbaycanın ərazi bütövlüyünü tanımaqları barədə bəyanat verəcəklər. Düzdür, Serj Sarkisyan BMT tribunasından iddia edib ki, Türkiyə sərhədləri açmazsa və soyqırımı tanımazsa, 2009-cu ildə imzaladıqları əməkdaşlıq protokollarını ləğv edəcəklər. Amma prezident Rəcəb Tayyib Ərdoğan BMT kürsüsündən bəyan edib ki, Qarabağ münaqişəsi Azərbaycanın ərazi bütövlüyü çərçivəsində həll edilməzsə, Ermənistanla heç bir diplomatik əlaqə qurulmayacaq.
Yeri gəlmişkən, Azərbaycanın Avropadan, konkret olaraq Çexiyadan aldığı silahlar – "Dana” özüyeriyən artilerriya qurğuları və RM-70 yaylım atəşi qurğuları artıq Ermənistanda ciddi həyəcan yaradıb. Qarabağı işğal etmiş erməni generallardan biri Norat Ter-Qriqoryans "1in.am” portalına müsahibəsində bildirib ki, Azərbaycan Qarabağda Ermənistanla vuruşmaq üçün lazım olandan 5-10 dəfə çox silah alır.
Ola bilər ki, xarici işlər naziri Edvard Nalbandyanın işğal etdikləri müəyyən rayonları Azərbaycana qaytarmağa hazır olduqları barədə verdiyi bəyanat da bu silahlarla bağlıdır. Amma bu silahları ölkədən miqrasiyaya təsiri göz qabağındadır. "1in.am” ın yazdığına görə, son günlərdə bu ölkədən Rusiyaya rəsmi miqrasiya xeyli artıb. Erməni diasporunun təmsilçilərinin verdiyi məlumata görə, Robert Koçaryanın hakimiyyəti dövründə bu ölkəni rəsmən 500 min nəfər, Serj Sarkisyanın hakimiyyəti dövründə isə 250 min nəfər tərk edib.
Qeyri-rəsmi miqrasiya isə qat-qat yüksəkdir, kənd yerlərində adamlar evlərini sadəcə bağlayıb geri dönmədən gedirlər. Halbuki, statistika onları Ermənistan vətəndaşı saymaqda davam edir. Bizim ordu gücləndikcə evini qoyub gedən ermənilər daha da artacaq.
Çingiz Rüstəmov
İstiPress
www.anews.az
Bizi sosial şəbəkələrdə izləyin !
