ABŞ-ın nüfuzlu senatorları - respublikaçı Con Makkeyn (John McCain) və demokrat Ben Kardin (Benjamin Cardin) “Maqnitski Aktı”nın bütün dünya ölkələrinə şamil olunması haqqında qanun layihəsi (“Global Human Rights Accountability Act”) hazırlayaraq Senata təqdim ediblər.APA-nın “Amerikanın səsi”nə istinadən yaydığı xəbərə görə, bu barədə B. Kardinin saytında məlumat verilib. “ABŞ-a səfər etmək azadlığı və bizim maliyyə sistemimizə çıxış imkanı elə imtiyazlardır ki, bunlar təməl insan haqlarını və qanunun aliliyini pozan şəxslərə şamil oluna bilməz”, deyə senatorun açıqlamasında bildirilir.   B. Kardin deyib ki, Zimbabvedən Ukraynaya, Hondurasdan Papua Yeni Qvineyaya qədər insan haqlarının kobud pozucuları öz əməllərinə görə məsuliyyətdən qaça bilməyəcəklər - hətta öz ölkələrində bu istiqamətdə hər hansı addım atılmasa belə. Qanun layihəsinə görə, ABŞ prezidenti insan hüquqları uğrunda mübarizə aparanların, hökumət üzvlərinin qanunsuz fəaliyyətini ifşa edənlərin qətli, işgəncələr məruz qalması və digər insan haqları pozuntularına görə məsuliyyət daşıyan xarici vətəndaşların adları olan siyahı hazırlamalı (etibarlı sübutlar əsasında) və daim bu siyahını yeniləməlidir. Həmin şəxslərin ABŞ ərazisinə girişi qadağan olunacaq və onlara daha əvvəl verilmiş viza ləğv ediləcək. Müəyyən hallarda siyahıya gizli əlavələr də edilə bilər. Adları siyahıya daxil edilmiş şəxslərin ABŞ-da əmlak sahəsində bütün əməliyyatları dayandırılacaq və qadağan olunacaq. Dövlət Departamenti və maliyyə naziri hər il Konqres qarşısında bu qanunun həyata keçirilməsi ilə bağlı hesabatla çıxış edəcəklər. Xatırladaq ki, “Maqnitski Aktı” (“Sergei Magnitsky Rule of Law Accountability Act”) 2012-ci ilin dekabrında ABŞ Konqresi tərəfindən qəbul olunub və insan haqlarını, qanunun aliliyini pozan şəxslərə qarşı sanksiyaların tətbiqini nəzərdə tutur. Qanun 2009-cu ildə Rusiyanın “Matrosskaya tişina” həbsxanasında ölən “Firestone Duncan” konsaltinq şirkətinin auditoru Sergey Maqnitskinin adı ilə adlandırılıb. 2011-ci ildə ABŞ Dövlət Departamenti S. Maqnitskinin ölümündə əli olan və ya əli olduğundan şübhə duyulan 60 rusiyalı məmurun ABŞ-a girişini yasaqlayıb.    ANN.Az