“Abşeron” yatağından 130 milyon kubmetr qaz hasil edilib

JOCAP  əməliyyat şirkəti ("Absheron Petroleum B.V.” Birgə Əməliyyat Şirkəti) 2024-cü ilin yanvarında Xəzər dənizindəki "Abşeron” qaz-kondensat yatağından 130 milyon kubmetr qaz hasil edib. Bu barədə Energetika Nazirliyi məlumat verib.


"Əməliyyat məlumatlarına görə, yanvarda "Abşeron” yatağından 130 milyon kubmetr təbii qaz və 50 min ton kondensat hasil edilib”, - nazirliyin məlumatında bildirilib. 

2023-cü ilin iyuldan  JOCAP "Abşeron” yatağından 930 milyon kubmetr təbii qaz və 350 min ton kondensat hasil edib.


"TotalEnergies” və SOCAR (Azərbaycan Dövlət Neft Şirkəti) 2023-cü il iyulun 10-da "Abşeron” yatağının işlənməsinin birinci mərhələsi çərçivəsində hasilata başlanıldığını elan ediblər.


Hazırda hasilatın birinci mərhələsi çərçivəsində "Abşeron” yatağından gündəlik 4,3 milyon kubmetr qaz və 1400 ton kondensat hasil edilir. Qaz Azərbaycanın daxili bazarı üçün nəzərdə tutulub.


SOCAR və TotalEnergies Abşeron layihəsində bərabər iştiraka malik idilər - hər biri 50%. Bununla belə, 2023-cü il avqustun 4-də Abu Dabi Milli Neft Şirkəti (ADNOC) layihədə 30% - SOCAR və TotalEnergies-dən hər biri 15% pay alıb. Sövdələşmə başa çatdıqdan sonra SOCAR və TotalEnergies-in Abşeron layihəsindəki payları hər biri 35% təşkil edəcək.


"Abşeron” yatağının işlənməsini "Absheron Petroleum B.V.” Birgə Əməliyyat Şirkəti həyata keçirir. (JOCAP), SOCAR Abşeron (50%) və TOTAL E&P Absheron (50%) tərəfindən yaradılmışdır. Müqavilə 30 il müddətinə imzalanıb. Müqavilə sahəsi 747 kv. km.


Abşeron bloku Bakıdan 100 km aralıda, 500 metr dərinlikdə yerləşir. 2019-cu ildə SOCAR və TOTAL şirkəti "Abşeron” yatağında dərinliyi 7411 metr olan "ABD-001” istismar-qiymətləndirmə quyusunda qazma işlərini başa çatdırıb. İlkin hesablamalara görə, yatağın ehtiyatları 350 milyard kubmetr qaz və 100 milyon ton kondensat təşkil edir, onun işlənməsi mərhələli şəkildə həyata keçiriləcək.



www.anews.az