ANAMA azad olunmuş ərazilərdə maarifləndirmə işlərini necə aparır? - AÇIQLAMA

ANAMA, Təhsil Nazirliyi və UNİCEF -in birgə tərəfdaşlığı ilə müharibədən zərərçəkmiş icmalarda partlayıcı sursatların təhlükəsinə dair maarifləndirmə (PSTM) işlərinə də başlayıb. Ümumilikdə aparılmış tədbirlər nəticəsində il ərzində 200 minə yaxın vətəndaş maarifləndirmə işlərinə cəlb edilib. Bu sözləri anews.az-a açıqlamasında ANAMA-nın maarifləndirmə işləri üzrə şöbə müdiri Ramil Əzizov deyib.
"ANAMA partlayıcı sursatların təhlükəsinə dair maarifləndirmə fəaliyyəti ilə bağlı müxtəlif istiqamətlər üzrə çalışır. İşğaldan azad edilmiş ərazilərə səfər edən şəxslərin risklər barədə məlumatlandırılması, kütləvi informasiya vasitələrində mina və PHS təhlükəsi ilə bağlı maarifləndirmə tədbirləri, mina qurbanları ilə reportajlar, müxtəlif dövlət qurumları ilə birgə hazırlanmış elektron çağırışlar və sms bildirişlərin yayılması, təhlükəli ərazilərin işarələnməsi fəaliyyətlərini həyata keçirir. Müharibədən zərərçəkmiş yaşayış məskənlərində 470 ədəd xəbərdaredici bilbordlar yerləşdirilib, 46.630 ədəd xəbərdaredici və maarifləndirici çap məhsulları sakinlər arasında paylanılıb və insanların daha çox toplaşdığı, səfər etdikləri yerlərdə yapışdırılıb. İl ərzində müharibədən zərərçəkmiş ərazilərdə fəaliyyət göstərən məktəblərdə tədris olunması üçün "Mina Təhülkəsi” ilə bağlı 4-cü və 6-9-cu sinif şagirdləri üçün nəzərdə tutulan 39.900 ədəd həm tədris, həm də metodik vəsaitləri çap edərək təhsil müəssilərinə təhvil vermiş, maarifləndirici tədbirlər həyata keçirib", ANAMA-nın əməkdaşı bildirib.
Ramil Əzizov onu da bildirib ki, hazırda işğaldan azad olunmuş ərazilərdə fəaliyyət göstərən qurumların və müəssisələrin əməkdaşlarının maarifləndirilməsi istiqamətində təlimlər aparılır və gələcəkdə riskli ərazilərdə yerləşən icma komitələrinin yaradılması, məktəblərdə maarifləndirmə tədbirlərinin gücləndirilməsi, maarifləndirici şəbəkənin yaradılması əsas hədəflərdəndir.
Gülnar Nazimqızı
www.anews.az
Oxşar xəbərlər
Oxşar xəbərlər
Son xəbərlər
Daha çox 