Tovuz rayon sakini Mübariz Mehdiyev redaksiyamıza müraciət edərək, Tovuz rayonunda tikintisi gedən ASAN Xidmət mərkəzinin binasında fəhlə kimi işləsə də, əmək haqqısını ala bilmədiyindən şikayətlənir.

Anews.az-a danışan şikayətçi deyir ki, atası və anası yaşlı olduğundan, məcburiyyətdən Tovuz rayonunda tikintisi gedən ASAN xidmət mərkəzində fəhlə kimi işləyib.

İyun və iyul aylarında orada fəhlə kimi işləsə də, sonradan bunun qarşılığında almalı olduğu məvacibi ala bilməyib.

"Mən dəfələrlə getdim ki, işləmişəm, pulumu verin. Əvvəlcə yaxın günlərdə veriləcək desələr də, verilmədi. Axırıncı dəfə avqustun 21-i getdim, dedilər orda tikintiyə rəhbərlik edən Fuad və Fatif adlı şəxslər burada yoxdurlar, sənə pulu verməli olan adam həbs olunub. Yenə vermədilər mənim pulumu”, - deyə şikayətçi, Tovuz rayon sakini Mübariz Mehdiyev bildirib.

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin mətbuat katibi Aynur Osmanqızı deyir ki, əmək haqqının verilməməsi ciddi qanun pozuntusudur.

Onun sözlərinə görə, vətəndaş bu halda müfəttişliyə müraciət etməlidir.



"Birinci dəqiqləşdirmək lazımdır ki, vətəndaş xidmət müqaviləsi ilə, yoxsa əmək müqaviləsi ilə işləyib. Əgər ortada müqavilə varsa, işçinin maaşı bütün hallarda verilməlidir və işə götürən məsuliyyət daşıyır. Vətəndaş Əmək Müfəttişliyinin ən yaxın regional bölməsinə yaxınlaşıb şikayət verə və ya müfəttişliyin qəbul şöbəsinə müraciət edib şikayətini deyə bilər.

Məsələ ilə bağlı Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə əlaqə saxlasaq da, suallarımıza cavab verəcək adamın olmadığını dedilər. Qurumun İctimaiyyətlə əlaqələr şöbəsinin müdiri Elnur Niftəliyev isə ölkə xaricində olduğunu bildirdi. Anews.az olaraq, agentliyin də mövqeyini dərc etməyə hazırıq.


www.anews.az