Sahibkarların müdafiəsini təmin etmək və onları məmur özbaşınalığından qorumaq üçün biz onların fəaliyyətinin "ASAN xidmət” vasitəsilə tənzimlənməsinə çalışmalıyıq.

Bu fikri Demokratik İslahatlar Partiyasının sədri, millət vəkili Asim Mollazadə parlamentdə keçirilən 2016-cı il dövlət büdcəsinin müzakirəsi zamanı səsləndirib.

Millət vəkilinin sözlərinə görə, ölkənin inkişafı üçün kiçik və orta sahibkarlığın inkişafı dəstəklənməli, sahibkarların müdafiəsi məqsədilə "ASAN xidmət”in fəaliyyəti genişləndirilməlidir. "Biz kiçik və orta sahibkarlığı inkişaf etdirmədən ölkə iqtisadiyyatının şaxələndirilməsinə nail ola bilməyəcəyik. Əgər biz bu sahənin inkişafını istəyiriksə, o zaman sahibkarların məmur özbaşınalığından, çoxsaylı yoxlamalardan xilas edilməsi istiqamətində real addımlar atmalıyıq. Sözdən real işə keçməyin vaxtıdır.” – deyə Asim Mollazadə bildirib. 

Büdcənin sosialyönümlü olduğunu vurğulayan millət vəkili, gələn ildə də sosial proqramların həyata keçiriləcəyinə, bu sahədəki problemlərin azalacağına ümid etdiyini deyib: "Büdcənin sosialyönümlü olduğunu nəzərə alaraq təklif edirəm ki, müharibə veteranları və şəhid ailələrinə olan diqqət artırılsın, onların problemləri həll edilsin. Yadda saxlamalıyıq ki, hələ də ölkəmizə qarşı aparılan müharibə bitməyib. Torpaqlarımız uğrunda qan tökmüş və canlarını vermiş insanlara diqqət yetirməli, onların sosial müdafiəsini gücləndirməliyik.”

A.Mollazadə indiyədək turizm, otelçilik sahəsinə yatırılan sərmayələrdən gəlir əldə etməyin vaxtı çatdığını da xatırladıb: "Ölkədə çox ciddi investisiya layihələri həyat keçirilib. Biz bunun büdcədə əksini görməli idik, amma görmədik. Bu sahənin inkişafı üçün təhsil sahəsində islahatlara ciddi ehtiyac var. Biz ancaq peşəkar kadrların köməyilə yatırılan sərmayələr nəticəsində əldə edilən gəlirləri büdcəyə qaytara bilərik. Ona görə də, peşə təhsilinə, ali təhsil ocaqlarında peşəkar kadrların hazırlanmasına diqqət yetirməliyk. Necə ki, belə gənc kadrlar hesabına "ASAN xidmət” öz effektini verir. Peşəkar kadrlar olmadan biz iqtisadiyyatın effektiv şaxələnməsinə nail ola bilməyəcəyik.” 

Millət vəkili çıxışında kənd təsərrüfatı sahəsinin inkişaf etdirilməsinin zəruri olduğunu, bunun üçün müasir texnologiyaların tətbiq edilməsinin vacibliyini də qeyd edib.