"Azərbaycan təbii qazının nəqli layihələri ilə bağlı Avropa maliyyə institutları tərəfindən müəyyən maliyyə gecikmələri var.  Ölkəmiz Avropanı qazla təmin etdiyi halda, Avropa bankları maliyyələşdirməyə hazır olduqlarını nümayiş etdirməyiblər, lakin Asiya İnkişaf Bankı bunu edib”, - Azərbaycan Respublikasının Prezidenti İlham Əliyev iyunun 27-də Asiya İnkişaf Bankının prezidenti Masatsuqa Asakava ilə görüşü zamanı deyib. 

Prezident İlham Əliyev həmçinin Asiya İnkişaf Bankı ilə səmərəli əməkdaşlığın davam etdirilməsi üçün yeni istiqamətlərin müəyyənləşdirilməsinin vacibliyini vurğulayıb. 

Söhbət zamanı yaşıl enerjinin istehsalı və ixracı məsələləri müzakirə olunub.

Azərbaycanda yaşıl enerji zonalarının yaradılmasının, o cümlədən işğaldan azad edilmiş ərazilərdə su elektrik stansiyalarının tikintisinin vacibliyini qeyd edən dövlət başçısı bildirib ki, bu ərazilərdə artıq 270 meqavata qədər gücə malik su elektrik potensialı yaradılıb.

Söhbət zamanı Şimal-Cənub dəmir yolu layihəsi üzrə əməkdaşlıq məsələlərinə toxunulub, Mərkəzi Asiya dövlətləri ilə Azərbaycan arasında nəqliyyat sahəsində əlaqələrin daha da genişləndirilməsi ilə bağlı fikir mübadiləsi aparılıb.

N.Təbrizli