“Azadlıq” qəzetinin baş redaktor müavini Rahim Hacıyev dekabrın 30-da açıqlama yayıb. Açıqlamada deyilir:     - Məlum olduğu kimi, “Azadlıq”ın cərimələnməsi haqqında məhkəmə qətnamələrinin yerinə yetirilməsi üçün qəzetin bank hesabına həbs qoyulmuşdu. Qəzetdən üst-üstə 65 min manat tələb olunurdu.Yaranmış ağır böhrandan çıxmaq üçün “Azadlıq” Avropa Birliyinin Demokratiyaya Dəstək Fonduna müraciət etdi. Bu fondun məqsədi demokratik institutların, o cümlədən demokratiya mövqeyində duran mətbuat orqanlarının dəstəklənməsidir. Fondun “Azadlıq” qəzeti ilə başlanmış əməkdaşlığı bəhrəsini verdi. “Azadlıq”la fond arasında bağlanmış qrant müqaviləsinə əsasən, hesabın açılması üçün zəruri olan məbləğ qəzetin hesabına köçürüldü və bunun nəticəsində hesabın açılması mümkün oldu.Təəssüflə qeyd etməliyəm ki, qəzetin vəziyyəti ağır olaraq qalır. Əvvəllər məlumat verdiyimiz kimi, metroda qəzet satışına qadağa qoyulması bizi hər ay kifayət qədər ciddi maliyyə vəsaitindən məhrum edir. “Azadlıq”a qarşı ciddi zərbə KİV-in İnkişafına Dövlət Dəstəyi Fondunun hesabın bağlı olduğunu əsas gətirərək qəzetin maliyyələşdirilməsini dayandırması olub. Oktyabr və noyabr aylarında fondla nəzərdə tutulmuş layihənin tamamilə icra olunmasına baxmayaraq qəzet 20 min manatlıq vəsaitdən məhrum edilib. Bizə bu vəsaitin ödənilməyəcəyi bildirilir.Bu günə olan başlıca problem redaksiyanın yeni ilə noyabrın ikinci yarısı, dekabr ayı üzrə əməkdaşlara maaşlar üzrə böyük borc məbləğində qədəm qoymasıdır. Dərin  təəssüf hissi ilə qeyd edirəm ki, bu ildə olduğu kimi gələn ildə də “Azadlıq” qəzetini mövcudluğunu davam etdirmək uğrunda ağır dövr gözləyir.(mediaforum.az)ANN.Az