"Azərbaycan Hava Yolları”nda heç bir yoxlama aparılmır. Bu barədə Rəqəmsal İnkişaf və Nəqliyyat Nazirliyinidən Qafqazinfonun sorğusuna cavab olaraq bildirilib.
"İddialar həqiqəti əks etdirmir: "Azərbaycan Hava Yolları” QSC-də (AZAL) yoxlamaların aparılması ilə bağlı mediada yayılan məlumatlarla əlaqədar bildiririk ki, Rəqəmsal İnkişaf və Nəqliyyat Nazirliyi tərəfindən AZAL-da hansısa yoxlama aparılmır. Bununla bağlı yayılan məlumatlar həqiqəti əks etdirmir” - nazirliyin açıqlamasında deyilib.
Bundan əvvəl Gununsəsi.info saytı AZAL-da yoxlamaların aparılması ilə bağlı xəbər yayıb. Saytda həmin qurumda xüsusi yoxlamaların aparılması qeyd olunub.
Azərbaycanın rəqəmsal inkişaf və nəqliyyat naziri Rəşad Nəbiyev AZAL-ın Müşahidə Şurasının rəhbəridir.
Milli Məclisin ötəngünkü iclasında AZAL-ın fəaliyyəti bir neçə deputat tərəfindən sərt tənqid edilmişdi. Millət vəkili Zahid Oruc bildirmişdi ki, şirkətin borcu dövlətin iqtisadi təhlükəsizliyini təhdid edir: "Bank kreditləri və digər borclanmalar 2022-ci il yanvarın 1-nə 2,1 milyard təşkil edir və nəinki likvidliyə, eləcə də dövlət büdcəsinə əsaslı təhdiddir” - deputat vurğulayıb.
"Azərbaycan Hava Yolları" QSC-nin prezidenti Cahangir Əsgərovdur.
www.anews.az
Bizi sosial şəbəkələrdə izləyin !