Azərbaycan ərazilərini azad etmək şansını əldən verdi?

09:30 | 22.08.2014
Azərbaycan ərazilərini azad etmək şansını əldən verdi?

Azərbaycan ərazilərini azad etmək şansını əldən verdi?

Vəfa Quluzadə: “Yaranmış vəziyyət heç də Azərbaycanın şansı deyildi...”; Azad İsazadə: “Hərbi əməliyyatlar başlayacağı halda ən uzağı bir həftə-10 günə yekunlaşmalıdır”; Etimad Əsədov: “Növbəti şansı əldən qaçırdıq...”İyulun sonları, avqustun əvvəllərində Azərbaycan-Ermənistan qoşunlarının təmas xəttində yaşanan gərginlik artıq səngiyib. Düzdür, atəşkəsin pozulması halları davam edir və vəziyyətin tam stabil olduğunu demək mümkün deyil. Lakin hər iki tərəfin itkilər verməsi ilə müşayiət olunan durumdan fərqli olaraq atəşkəsin pozulması halları minimuma düşüb.Bəzi müşahidəçilər hələ də hesab edir ki, düşmənin azğınlığının son həddə çatdığı həmin günlərdə Azərbaycanın öz torpaqlarını azad etməsi üçün böyük bir şans yaranmışdı. Həmin günlərdə əhalinin böyük əksəriyyətinin savaşa köklənməsi, düşmənə qarşı nifrət hissinin xeyli artması, kütləvi şəkildə cəbhəyə yazılmaqla bağlı təşəbbüs və çağırışların, rəsmi qurumlara müraciətlərin olması, iqtidarda, ya müxalifətdə olmasından asılı olmayaraq hər kəsin Qarabağın azadlığına hazır olduğunu bildirməsi savaş qərarının verilməsi üçün münbit şərait yaratmışdı. Paralel olaraq bir sıra beynəlxalq şərtlər, xüsusilə də Rusiyanın Ukrayna bataqlığına düşməsi, dünya güclərinin Yaxın və Orta Şərqdə baş verənlərə müdaxilə etməkdən belə yayınması təcavüzə məruz qalan Azərbaycana savaş qərarı vermək şansını vermişdi. Ancaq fərqli düşünənlər, xüsusilə də Rusiyanın Ermənistana hərbi dəstək verdiyini xatırladıb Azərbaycanın Gürcüstan və Ukraynanın faciəsini yaşamamasından ötrü daha bir neçə il, ən azı Rusiyanın zəifləməsi şəraitini gözləməyi məqbul sayanlar da var. 

Politoloq Vəfa Quluzadə yaranmış vəziyyəti heç də Azərbaycanın şansı hesab etmir: “Mən yenə o fikirdəyəm ki, cəbhədə təxribatı törədən Rusiya oldu. Rusiya üçün orda böyük bir hadisə lazım idi ki, prezidentləri öz yanına -  Soçiyə dəvət etsin. Əgər Azərbaycan torpaqlarını azad etməyə qərar vermiş olsaydı, savaş davam edəcəkdi, Soçi görüşü olmayacaqdı və geniş miqyaslı müharibə baş verəcəkdi. Azərbaycan onda gərək bu təxribatdan sonra ermənilərin bütün nöqtələrinə zərbə endirəydi. Ancaq Azərbaycan bunu etmədi. Çünki Ermənistan Rusiyanın əlində bir oyuncaqdır. Biz bu oyuncaqla müharibə edə, onu darmadağın edə bilmərik. Çünki arxasında nüvə dövləti olan nəhəng Rusiya var. Rusiya olmasaydı, bu oyuncaq bizim torpaqlarımızda otura bilməzdi. Baxın, Rusiya azğınlıq edir, ancaq NATO Rusiya ilə müharibəyə girişmir. Ona görə də bu, Azərbaycanın şansı deyildi”.

V.Quluzadə Azərbaycanda müharibəyə çağırış edənləri iki kateqoriyaya bölməyin tərəfdarıdır: “Əhali artıq 22 ildir torpaqların azadlığını gözləməkdən bezib. Mən bu gün Mərdəkanda bir qaçqınla danışmışam. Soruşurdu ki, Vəfa müəllim, bu vəziyyət nə qədər davam edəcək, bizim gözəl torpaqlarımız, meşələrimiz, dağlarımız nə vaxt azad olunacaq? Adamın ürəyi ağrıyır. Bəli, xalq istəyir ki, biz gedək torpaqları azad edək. Ancaq burda başqaları da var. Söhbət Rusiyanın xeyrinə işləyən 5-ci kolondan gedir. Onlar da istəyir ki, gedib müharibə edək, uduzaq, darmadağın olaq. Ona görə də məsələyə soyuqqanlı yanaşmaq lazımdır. Bu, Rusiyanın təxribatı idi və Soçi görüşünü təşkil etmək üçün törədilən, Azərbaycanı hədələmək üçün düşünülmüşdü”.

Hərbi ekspert Azad İsazadə deyir ki, torpaqları azad etmək üçün fürsət həmişə var: “Biz hər bir məqamdan istifadə etməliyik, amma təbii ki, hazırlıqlı olmalıyıq. Texniki-hərbi baxımdan hazırıq. Söhbət siyasi vəziyyətdən gedir. Hərbi əməliyyatlara qərar veriləcəyi halda siyasi təzyiqlərlə rastlaşacağımız qaçılmazdır. Ukraynadakı vəziyyət Cənubi Qafqazdakı proseslərin diqqətdən uzaqlaşmasına gətirib çıxarıb. O mənada atəşkəsin ciddi şəkildə pozulduğu günlərdə məqamdan istifadə etmək olardı. Amma gördüyünüz kimi, Rusiya o saat Soçi görüşünü keçirdi və vəziyyəti nəzarətə almağa nail oldu”.

A.İsazadə bu qənaətdədir ki, hərbi əməliyyatlar başlayacağı halda ən uzağı bir həftə-10 günə yekunlaşmalıdır. Çünki bu müddətdən sonra Azərbaycan ciddi təzyiqlərlə üz-üzə qala bilər: “Deməli, nə ediriksə, bir həftəyə etməliyik. Bu dəfə gərginlikdən sonra Azərbaycan ağır texnika və artilleriyanı cəbhəyə daşıdı. Deməli, Bakı hansısa əməliyyat və ya savaşa başlamağı planlaşdırmamışdı. Təyyarələri də havaya qaldırdılar, ancaq atəş açmadı. Bununla demək istədilər ki, sadəcə, vəziyyəti sabitləşdirmək və ermənilərin hansısa hücumunun qarşısını almaq istəyirlər. Belə məqamlar periodik olacaq və biz düşmənə cavab verməyə hazırıq. Amma əvvəlcədən siyasi baxımdan hazırlıqlı olmalıyıq ki, beynəlxalq təzyiqlər qarşısında qalmayaq”.

Qarabağ Qazilər Birliyinin sədri Etimad Əsədov savaşa başlamaq üçün şansın yarandığı qənaətindədir: “Atəşkəsin ciddi şəkildə pozulması nəticəsində çoxlu şəhidlər verdik, Allah bütün şəhidlərimizə rəhmət eləsin. O günlərdə Müdafiə Nazirliyinin məsələyə sərt reaksiyası, hərbi qüvvələrin cəbhə xəttində cəmlənməsi və düşmənə layiqincə cavab verməsi, ermənilərin də böyük itkilərə məruz qalması cəmiyyətdə böyük yüksəkliyinə səbəb olmuşdu. Hesab olunurdu ki, Azərbaycan nəhayət, torpaqlarını azad etməyə başlayacaq. Çünki ermənilər öz xəbis niyyətlərindən əl çəkmirlər. Ölkə rəhbərliyi başda olmaqla Ermənistan hər cür alçaq addımlara gedirlər.

Biz Qarabağ döyüşçüləri olaraq Ali Baş Komandana və müdafiə nazirinə müraciət etdik ki, müharibə insanları, təcrübə qazanmış şəxslər olaraq hər zaman silaha sarılmağa, torpaqlarımızı işğaldan təmizləyərək qalib, azad ölkənin vətəndaşları adını daşımağa, Vətən uğrunda şəhidlik zirvəsinə ucalmağa hazırıq. Ona görə də yetər ki, müharibə əmri verilsin və biz də Azərbaycan torpaqlarının azadlığı uğrunda əməliyyatların iştirakçısı olaq”. E.Əsədov yenə də danışıqlar prosesinə gedilməsi barədə qərarın verilməsindən təəssüfünü ifadə etdi: “Bu da açığı, bizdə ruh düşkünlüyü yaratdı. Bizi narahat edən bir məsələ var, indiki vəziyyət nə qədər davam edə bilər? Düşmən sülh yolu ilə mənfur niyyətindən əl çəkməyəcək, torpaqları azad etməyəcək. Ona görə də biz növbəti şansı əldən qaçırdıq. Yaxın Şərqdə baş verən proseslər, Rusiya-Ukrayna gərginliyi, İraqdakı İŞİD məsələsi, kürd dövlətinin yaradılması istiqamətində addımlara edilən yardımlar, İsrail-Fələstin gərginliyi bizə də situasiyadan bəhrələnib torpaqlarımızı azad etmək şansı vermişdi. Amma nə vaxt ki, Azərbaycan dövləti savaş qərarı verəcək, başda müharibə veteranları olmaqla xalqımız torpaqlarını azad etməyə hazırdır”. Keçmiş döyüşçü bildirdi ki, ona çoxlu sayda əlillər müraciət edərək savaşa hazır olduqlarını, cəbhəyə getmək istədiklərini bildiriblər: “Deyirlər ki, xahiş edirik bizim də adımızı siyahıya yazın, kənarda qalmayaq. Şəxsən mən protezlə gəzməyimə baxmayaraq, normal gəzə bilirəm. Odur ki, hər an döyüşə getməyə, əsgər və zabitlərimizlə birgə səngərdə olmağa hazıram”. ANN.Az
0
Bizi sosial şəbəkələrdə izləyin !

REKLAM