Azərbaycan gender bərabərliyi indeksində irəlilədi

"Avropa Şurasında Azərbaycanın gender bərabərliyi üzrə qərarlaşdığı 3-cü qrupdan 2-ci qrupa daxil edilməsi müzakirə olunub”. Bunu APA-ya açıqlamasında Avropa Şurasının gender bərabərliyi üzrə Komissiyasının iclasında Azərbaycan hökumətini təmsil edən Ailə, Qadın və Uşaq Problemləri üzrə Dövlət Komitəsinin İnformasiya və Analitik araşdırmalar şöbəsinin müdiri Elgün Səfərov deyib.

 

E. Səfərov bildirib ki, müzakirələr zamanı Azərbaycanda son bələdiyyə seçkilərində bələdiyyə üzvü olan qadınların sayının artaraq 34,9 faizə çatması müsbət hal kimi qiymətləndirilib: "Eyni zamanda, icra başçılarının qadın müavinlərinin sayının artması da müsbət tendensiya kimi xarakterizə olunub. Avropa Şurası gender bərabərliyi üzrə ölkələri 4 qrupa ayırır ki, Azərbaycan 2009-cu ildə aparılmış qiymətləndirmənin hesabına 3-cü qrupda yer alıb. Bildirim ki, son bələdiyyə seçkilərində bələdiyyə üzvü olan, habelə bələdiyyə sədri olan qadınların sayının artması faktı nəzərə alınmayıb. Bu ilin sonuna kimi sorğu keçiriləcək. Yeni məlumatlar əlavə edildikdən sonra Azərbaycan 2-ci qrupa yüksələcək. Qeyd etmək istəyirəm ki, Ermənistan 4-cü qrupdadır”.

 

E. Səfərov müzakirələr zamanı hazırda müharibə şəraitində yaşayan ukraynalı nümayəndələrlə təcrübə mübadiləsinin aparıldığını qeyd edib: "Dağlıq Qarabağ münaqişəsi nəticəsində 450 min azərbaycanlı qadınının zorakılığa məruz qaldığını ukraynalıların diqqətinə çatdırdıq. Müharibədən əziyyət çəkən ölkə kimi öz təcrübəmizi onlarla bölüşdük”.