Azərbaycan icbari sosial sığorta sahəsində islahatlar aparılacaq

Bu gün Dövlət Sosial Müdafiə Fondu (DSMF) gələcək prioritetlərini açıqlayıb.Fond bütün Azərbaycanı əhatə edən vahid fərdi uçot məlumatlarına əsasən pensiya hesablanmasını nəzərdə tutan pensiya sığorta sisteminin maliyyə dayanıqlığını daha da artırmaq, bazar iqtisadiyyatının şərtlərinə uyğun inkişafını reallaşdırmaq və bu əsasda prinsipləri daha da gücləndirmək, əhaliyə dövlət pensiya təminatından əlavə, özəl qeyri-dövlət pensiya fondları vasitəsilə pensiya təminatı imkanlarını yaradacaq. «APA-Economics»in məlumatına görə, qurumun yeni hədəfləri haqqında DSMF sədri Elman Mehdiyev danışıb. Onun sözlərinə görə, Fondun əsas məqsədlərindən biri dövlətin maliyyə öhdəlikləri ilə sığorta pensiya sisteminin öhdəliklərinin fərqləndirilməsi olacaq. O, deyib ki, hazırda DSMF-nin üzərində birbaşa dövlət öhdəliklərinə aid olan qeyri-sığorta xarakterli maliyyə öhdəlikləri var. Bu öhdəliklərin fərqləndirilməsi və Fondun sərbəst vəsaitlərinin əldə olunaraq, maliyyə alətlərindən istifadə edilməklə, maliyyə bazarında iştirak etməsi, gəlirlərinin artması qarşıda duran prioritetlərdəndir. E.Mehdiyev ümumilikdə qeyri-sığorta xarakterli maliyyə öhdəliklərinin 1,3 mlrd. manata yaxın olduğunu açıqlayıb: «Lakin dövlət büdcəsindən ayrılan transfertlərin həcmi bundan aşağı məbləğdədir. Bundan başqa, sosial sığorta haqları ilə təyin olunan pensiyalar arasındakı uyğunsuzluğun da aradan qaldırılması mühüm islahat istiqamətlərindəndir. Məsələn, rayon yerlərində, kiçik sahibkarlıq subyektlərində sosial sığorta haqlarının cəlb olunma dərəcələrinə diqqət yetirilsə, bunun hazırda təyin olunan pensiyalar arasında çox böyük fərqə gətirib çıxardığını müşahidə etmək mümkündür. Bu, maliyyə dayanıqlığına mənfi təsir göstərən amillər kimi qiymətləndirilir. Həmin məsələnin də tənzimlənməsi hədəflərdən biridir». Qeyd edək ki, DSMF növbəti islahatlarını fərdi hesabları ödənilən sosial sığorta haqlarının tam məbləğdə əks olunması sistemində aparmağı planlaşdırır. Bundan başqa, daha yüksək əmək haqqından yüksək sığorta haqqı ödəyən şəxslərə müəyyən təşviq vasitələrinin verilməsi də nəzərdə tutulub. Yəni, vətəndaş istəyindən asılı olaraq, sığorta haqqını dövlət məcburi sosial sığortalanma sistemində saxlayaraq, sığorta hissəsi vasitəsilə təminatına keçirə və ya könüllü şəkildə DSMF-nin yeni təqdim edəcəyi yığım elementinin istifadəsinə yönəldə biləcək. Həmçinin, DSMF sosial sığorta haqqının normativinin də strukturunu təkmilləşdirməyi planlaşdırır.ANN.Az