Azərbaycan və Rusiya adından yayılan məktubların arxasında kimlər dayanır? - Zaxarova

"Əgər "bu kimə sərfəlidir?" sualını versək, cavab açıq-aşkardır. Bu, Rusiya və Azərbaycanın normal münasibətlərinin olmasını istəməyənlərə sərfəlidir. Bu münasibətlər təkcə onilliklər ərzində deyil, uzun illər boyunca xalqların sülh və hörmət şəraitində birlikdə yaşaması ilə qurulub. Və ümid edirəm ki, bu birlik gələcəkdə də davam edəcək. Lakin bu birlik bəzi dairələri narahat edir. Kimlərin bu işin sifarişçisi olduğunu tam dəqiq söyləmək mümkün deyil, bunun üçün xüsusi araşdırma aparmaq lazımdır", – Zaxarova bildirib.

Rusiya XİN rəsmisi əlavə edib ki, təkcə Azərbaycan və Rusiya arasında deyil, ümumiyyətlə MDB ölkələri arasındakı əlaqələri pozmağa çalışanların arxasında Qərb dayanır.

"Bu sadəcə bir sifariş deyil. Onlar [Qərb] bunu açıq şəkildə edir, milyardlarla vəsait xərcləyir və istənilən təxribatdan, çirkin vasitələrdən istifadə edərək bizim geniş Avrasiya məkanımızı daim təzyiq altında saxlamağa çalışırlar", –  Zaxarova vurğulayıb.

Rusiya XİN bu məktubu "hiyləgər saxtakarlıq" adlandıraraq, onun reallıqla heç bir əlaqəsinin olmadığını bəyan edib. İngilis dilində yazılmış bu mətn guya Rusiyanın öz hava məkanından istifadə təhlükəsizliyinə zəmanət verə bilmədiyini iddia edirdi.

Bundan əlavə, Azərbaycan Xarici İşlər Nazirliyinin mətbuat katibinin adından yayılan saxta bəyanatda guya AZAL təyyarəsinin quşlarla toqquşması ilə bağlı ilkin araşdırmaların bu versiyanı təsdiqlədiyi iddia edilirdi.