ANN.az xəbər verir ki, Azərbaycan Milli Elmlər Akademiyası (AMEA) Coğrafiya İnstitutunun İqlim və aqroiqlimşünaslıq şöbəsinin baş elmi işçisi, coğrafiya üzrə fəlsəfə doktoru Məhərrəm Həsənov APA-ya bildirib ki, getdikcə güclü küləklər tez-tez təkrarlanır, ölkəyə isti hava kütlələri daha çox daxil olur. Bu da iqlim dəyişmələri ilə əlaqədar proseslərdən biridir: "90-cı ildən sonra küləklərin intensivliyi daha çox qeydə alınır. Məsələn, əvvəllər 10 ildə 2 dəfə güclü külək əsirdisə, indi 10 ildə 4-5 dəfə olur".

 

M.Həsənov əlavə edib ki, son günlər ölkə ərazisində müşahidə edilən güclü küləklər 3-5 ildən bir qeydə alınır: "Bu da ölkəmiz üçün gözlənilməz hadisə deyil. Keçid fəsli olan yazda atmosfer təzyiqi ərazilər arasında tez-tez dəyişdiyindən belə küləklər 3-5 ildən bir baş verir. Güclü küləklər 3 gün, maksimum 5 gün ərzində davam edir. Sonradan küləyin sürəti azalır və hava tədricən öz əvvəlki vəziyyətinə qayıdır".