Rəsmi statsitikaya əsasən, 2013-cü ildə narkomaniya xəstəliyinə düçar olmuş şəxslərin ümumi sayı 28376 nəfər olduğu halda, 2014-cü ildə bu xəstəliyə düçar olmuş şəxslərin sayı 28656 nəfər təşkil edir. Sözügedən bəlaya düçar olan yeniyetmə və gənclərin sayı bir il ərzində 80 nəfər artıb. Narkoman kimi rəsmi qeydə alınanların 5 nəfəri 15-17 yaşlı yeniyetmələrdir.

2014-cü ilin statsitikasında toksimanların ümumi sayı 152 nəfərdir.

Modern.az saytının məlumatına əsasən, bu faktları Səhiyyə Nazirliyi Respublika Narkoloji Mərkəzinin direktoru Telman Məmmədhəsənov sadalayıb.

O, bildirib ki, narkomaniya asılığın ən ağır növüdür: " Bü gün bəzi valideynlər hesab edir ki, övladlarının xoşbəxt olması üçün onları maddi cəhətdən təmin etmək lazımdır. Yeniyetmələrin nümayişkaranə surətdə müstəqilliyə can atmaları, böyüklərin himayəsindən qurtulmaq istiqamətində daimi istəkləri tez-tez böyüklərlə münasibətdə ciddi fikir ayrılıqlarının yaranmasına gətirib çıxarır. Bu məsələdə yeniyetmələrə xas olan bəzi psixoloji xüsusiyyət cizgiləri-həzz almağa cəhd, etiraz reaksiyasının asanlıqla yaranması, dəstə şəklində fəaliyyət göstərməyə meyllilik, əhvaldakı qeyri-sabitlik də böyük əhəmiyyət kəsb edir. Narkomaniya təkcə "küçə uşaqları”nın deyil, həm də firəvan ailələrin bəlasıdır. Normal ailələr leqal narkotiklərdən-alkoqol və nikotindən istifadə etməklə narkotikləşməyə öz töhfələrini verirlər. Belə olan hallarda çox vaxt uşağın masasının üzərində olan alkoqollu içkilər evdəki bayram, şadyanalıq atmosferi ilə əlaqələndirilir. Sosioloji rəy sorğularının nəticələrinə görə, uğurlu ailələrdən yetkinlik yaşına çatmayan narkomanların 82 faizi öz narkogen "karyeralarına” böyüklərin məclislərini dəstəkləməklə ev şənliklərindən başlayıb”.

Mərkəzin direktoru eyni zamanda qeyd edib ki, qadınlar kişilərə nisbətən narkomaniya xəstəliyinə daha az düçar olurlar: "Rəsmi statistikaya əsasən, Azərbaycanda narkomaniya xəstəliyinə düçar olmuş qadınların sayı, kişilərə nisbətən dəfələrlə az olsa da (2013-cü ildə 539, 2014-cü ildə 554 qadın), onların sayı ildən-ilə artır. Və təəsüflə demək lazımdır ki, onların əksəriyyəti narkomaniyanın ən ağır forması olan inyeksion narkotik istifadəçiləridir (2013-cü ildə 393, 2014-cü ildə 409 nəfər). Narkomaniya xəstəsi olan qadınlarda hamiləlik və doğuş zamanı tez-tez kəskinləşmələr yaranır, yeni doğulan körpələr arasında erkən ölüm halları da nadir hadisə deyil. Qadınlarda narkotiklərdən psixi və fiziki asılılıq nisbətən daha tez formalaşır. Belə ki, istifadəyə başladıqdan sonra asılılığın formalaşmasının ortalama müddəti 2 aydır”.

Telman Məmmədhəsənov vurğulayıb ki, narkomaniyaya düçar olmuş insanları normal həyata və cəmiyyətə qaytarmaq məsələsinin vacibliyini nəzərə alaraq "Narkotik vasitələrin psixotrop maddələrin və onların prekursorlarının qanunsuz dövriyyəsinə və narkomanlığıa qarşı mübarizəyə dair” üç Dövlət Proqramı təsdiq edilib ki, onların ikisi tam icra olunub.