Azərsu - İçməli suyun bahalaşması üçün Tarif Şurasına müraciət edilməyib
13.03.2023 11:17
"Azərsu” Açıq Səhmdar Cəmiyyəti tərəfindən həyata keçirilən içməli su təchizatı və tullantı sularının axıdılması xidmətlərinin tariflərinin artırılması ilə bağlı Azərbaycan Respublikası Tarif (qiymət) Şurasına müraciət edilməyib və belə bir müraciət nəzərdə tutulmur. Bu barədə Azərsu ASC-nin məlumatında bildirilir.
Martın 10-da "Azərsu ASC"-nin sədr müavini Etibar Məmmədov jurnalistlər üçün keçirdiyi mətbuat konfrasında deyib ki, hazırda içməli su əhaliyə maya dəyərindən aşağı satılır.
"Tariflər normal olsa, "Azərsu” ASC daha rentabelli fəaliyyət göstərə bilər. Tariflərin gələcəkdə artırılması üçün biz də təşəbbüslə çıxış etmək istəyirik. İnkişaf etmiş ölkələrin heç birində və postsovet ölkələrinin heç birində bu tariflə su satılmır. Suyun qiymətinin artması bizim istəyimizdən asılı deyil. Lakin dövlət nə qərar qəbul edəcəksə, ona uyğun addım atılacaq. Əldə olunan vəsait şəbəkələrin yenilənməsinə sərf olunur”, - Azərsu rəsmisi vurğulayıb.
Meliorasiya və Su Təsərrüfatı ASC-nin sədr müavini Rafiq Aslanov isə çıxışında qeyd edib ki, hazırda suyun 1000 kubun qiyməti dövlətə 70-80 manata başa gəlir.
Azərbaycanda sonuncu dəfə suyun qiyməti 2021-ci ilin yanvarında Tarif Şurasının qərarı ilə bahalaşıb.
Belə ki, bir kubmetr su təchizatının tarifi ƏDV daxil olmaqla əhali üzrə Bakı, Sumqayıt, Xırdalan və Abşeron üçün 70 qəpik, digər inzibati ərazi vahidləri üzrə 60 qəpik, tullantı sularının axıdılması xidmətinin tarifi isə ölkə üzrə bir kubmetr üçün 30 qəpik səviyyəsində təsdiq olunub.
Gülnar Nazimqızı
www.anews.az
Oxşar xəbərlər
Oxşar xəbərlər
Son xəbərlər 
Daha çox
Foto 
Video 
