Noyabrın 5-6-da “Fairmont Baku” mehmanxanasında Azərbaycan Respublikası Dövlət Neft Şirkətinin (ARDNŞ) neft-qaz emalı və neft-kimya kompleksi (NQNK) layihəsinə həsr olunan “NQNK forumu” keçiriləcək.
“İteca Caspian” şirkətindən AzərTAc-a bildiriblər ki, sayca ikinci olan forumun təşkilatçıları “Caspian Event Organisers”, “İteca Caspian” və “INBC Consulting” şirkətləridir.
Hazırda NQNK layihəsinin təşəbbüskarları EPC (layihələndirmə-satınalma-tikinti) adlanan ikinci mərhələyə, yeni layihənin bilavasitə həyata keçirilməsi mərhələsinə başlayırlar.
Forum həm dünya, həm də yerli miqyasda aparıcı şirkətlərə rəhbərlər və digər yüksək səviyyəli nümayəndələr səviyyəsində NQNK layihəsinin həyata keçirilməsi zamanı tətbiq etməyə hazır olduqları neft-qaz emalı və neft-kimya sahəsi üzrə təcrübə və texnologiyalarını, eləcə də digər resursları, habelə innovasiyalı həll variantlarını təqdim etmək üçün nadir şərait yaradacaq. Builki forumun məqsədi açar təhvili üzrə tikinti işlərinə, habelə neft-qaz emalı və neft-kimya zavodlarının tikintisi zamanı göstərilən xidmətlərə birbaşa cəlb olunacaq şirkətlərin ünsiyyəti və qarşılıqlı əlaqəsi üçün meydançanın təşkil edilməsidir. Forumda iştirak etmək üçün EPC (layihələndirmə-satınalma-tikinti) və digər işlər üzrə podratçılar, habelə mühəndis şirkətləri, lisenziyalar, neft-qaz emalı və neft-kimya avadanlıqlarının qlobal istehsalçı və təchizatçıları, logistika-tikinti şirkətləri, material və həll variantları üzrə təchizatçılar, texnologiya üzrə məsləhətçilər, maliyyə qurumları, hüququ və maliyyə ekspertləri və ətraf mühit üzrə məsləhətçilər dəvət olunurlar. Həmçinin forumda sponsor, məruzəçi və nümayəndə qismində, eləcə də stendin təşkili və forum kataloqunda reklam yerləşdirmək yolu ilə də iştirak etmək olar.
Rəsmi açılışının ARDNŞ-in prezidenti Rövnəq Abdullayev tərəfindən ediləcəyi tədbirdə beynəlxalq şirkətlərin rəhbərlərinin, eyni zamanda, nadir sahə texnologiyalarını, oxşar layihələr üzrə təcrübə və biliklərini təqdim edən müvafiq dövlət qurumlarının yüksək səviyyəli təmsilçilərinin iştirakı gözlənilir.
AzərTAc
