Mərkəzi Bank sədrinin bəyanatından sonra vəziyyət necə olacaq? Banklar Mərkəzi Bankın verdiyi tapşırıqları həyata keçirəcəkmi? Manatla kredit verib, sonradan ödənişin dollarla tələbə edən bankları hansı cəzalar gözləyir? Bu sualları aydınlaşdırmaq üçün iqtisadçı ekspert Oqtay Haqverdiyevə müraciət etdik.

  

İqtisadçı ekspert ANN.Az-a açıqlamasında Mərkəzi Bankın rəhbəri Elman Rüstəmovun fikirlərini şərh edərkən bildirdi ki, əgər Mərkəzi Bank banklara bildirirsə ki, banklardan götürülən kredit müqaviləsində hansı valyuta ilə kredit götürübsə, o valyutada da qaytarmalıdır, banklarda buna birmənalı olaraq əməl etməlidirlər. Banklar haqqında qanundakı qaydaları Mərkəzi Bank özü müəyyənləşdirir, yəni hansısa bank bu qaydalara - Mərkəzi Bankın göstərdiyi qaydalara əməl etməsə, həmin bank ya cəzalandırılacaq, ya da lisenziyası əlindən alınacaq.

 
Ekspert qeyd etdi ki, manatın indiki məzənnəsi ilin sonuna qədər bu qaydada qalacaq:

"Yəni manatın məzənnəsində dəyişiklik çox güclü olmayacaq. Dəyişiklik çox cüzi ola bilər. Çünki manatın məzənnəsi  birdən-birə 33% aşağı salınıb. Hesab etmirəm ki, manatın məzənnəsi bundanda çox ucuzlaşsın".