Səudiyyə Ərəbistan birjası öz dəyərini 6.5% itirib. Səudiyyə Ərəbistanı birjasında Tadawul indeksi ilk anlardan etibarən 300 bal itirərək 5.500-dən aşağı düşüb.

Birləşmiş Ərəb Əmirlikləri (BƏƏ) birjaları da həftəyə rekord itkilərlə başlayıb. Dubay birjasında DFM indeksi 2.6672,33 bal düşərək rekorda imza atıb. Onu, 2.68% itki və 3.837,81 bal geriləmə ilə Əbu-Dabi birjası izləyib.

Oxşar vəziyyət regionun ən böyük ikinci birjasına sahib Qətərdə də müşahidə olunub. Qətər birjası açıldıqdan 1 saat sonra əsas indeks 5%-lik geriləmə ilə 8.800 baldan aşağı düşüb.

Küveyt birjası isə 2.4% dəyər itkisi ilə 5.000 bala çatıb.

Körfəz birjalarında kəskin geriləməyə, neft qiymətlərinin ucuzlaşmaqda davam etməsi və ABŞ-la Avropanın İrana tətbiq etdiyi sanksiyaların ləğv olunması səbəb kimi göstərilir. Çünki rəsmi Tehran sanksiyaların ləğv olunması ilə neft istehsalını artıracağını açıqlayıb.

İrana qarşı tətbiq olunan sanksiyaların aradan qaldırılmasından sonra bir barel neftin qiyməti 29 dollardan aşağı düşüb. Ekspertlər qiymətlərin 20 dollara qədər düşəcəyini ehtimal edirlər. Buna səbəb isə, İranın dünya neft bazarında hasilat payını artırması olacaq. Rəsmi Tehranın dərhal neft hasilatını günlük olaraq 500 min barel artıracağı gözlənilir. Bununla İranın il ərzində günlük hasilatı 1 milyon barelə çata bilər. Növbəti mərhələdə isə, hasilat günlük olaraq 1.5 milyon barelə qədər artırılacaq.
www.ann.az