Üç ölkə Ukrayna taxılına dair AK-nın platformasında iştirakdan imtina edib

Polşa , Slovakiya və Macarıstan Avropa Komissiyasının (AK) taxıl tədarükü məsələləri üzrə koordinasiya platformasında iştirak etməmək qərarına gəliblər.

Bu barədə Polşanın PAP agentliyi Brüsseldəki mənbələrə istinadən  məlumat yayıb.

Materialda qeyd olunur ki, bu ölkələrin hökumətləri Kiyevdən gələn təhdidlərə görə bu qərarı veriblər . Xüsusilə, söhbət Ukrayna hakimiyyətinin qonşu dövlətlərin taxıl embarqosunun müddətinin uzadılması ilə bağlı Ümumdünya Ticarət Təşkilatına (ÜTT) müraciət etmək niyyətindən gedir.

"Polşa, Macarıstan və Slovakiya ehtiyatlı davranaraq platformadan çıxırlar”, – yazıda deyilir.

Agentliyin məlumatına görə, Avropa dövlətləri koordinasiya platformasının işi çərçivəsində hər hansı məlumatı Ukrayna ilə bölüşməkdən çəkinirlər. Budapeşt , Varşava və Bratislava istisna etmirlər ki, Kiyev ÜTT-dəki proseslər zamanı əldə etdiyi məlumatlardan istifadə edə bilər.

Eyni zamanda, platformanın işində ilkin olaraq AK və daha altı ölkənin nümayəndələri iştirak ediblər. Bunlara Ukrayna, Rumıniya , Bolqarıstan , Polşa, Slovakiya və Macarıstan daxildir.

Sentyabrın 15-də Avropa Komissiyası Ukraynanın kənd təsərrüfatı məhsullarının regional birlik ölkələrinə ixracına qoyulan qadağanı aradan qaldırmaq barədə qərar qəbul edib . Eyni zamanda, Kiyev hakimiyyəti üç gün ərzində xaricə taxıl ixracına nəzarəti nəzərdə tutan fəaliyyət planı hazırlamağa söz verib.