Azərbaycan Respublikasının Vəkillər Kollegiyasının sədri ANAR
BAĞIROVUN iştirakı ilə təşkil olunmuş iki saatlıq Online Round Table çərçivəsində
sahibkarların COVİD-19 pandemiyası dövründə vəkillərin fəaliyyəti, məhkəmə
sistemində keçirilən islahatlar, şirkətlərin hüquqi marifləndirilməsi istiqamətində
həyata keçirilən layihələr və sahibkarlara hüquq xidmətlərin göstərilməsinin
yeni üsulları müzakirə olunub.
Bu barədə Caspian European Club və Caspian Energy qrupunun sədri və
baş icraçı direktoru Telman Əliyev məlumat verib.
Vəkillər Kollegiyasının sədri Anar Bağırov tədbir iştirakıçılarını
salamlayaraq, son illər Azərbaycan vəkilliyinin inkişafında Azərbaycan
Respublikasının Prezidenti cənab İlham Əliyev tərəfindən qəbul edilmiş fərman və
sərəncamların tarixi əhəmiyyəti, sahibkarlarının maraqlarının məhkəmə müdafiəsi
işində vəkillərin rolu, bu istiqamətdə vəkillərin ixtisaslaşmasının
aparılmasının zəruriliyi, məhkəmə hakimiyyəti sahəsində aparılan islahatlar və
islahatların azad sahibkarlığa təsiri, xüsusilə mediasiya institutunun
kommersiya mübahisələrinin həllində yeri barədə məlumat vermiş, pandemiya şəraitində
hüquqi xidmətlərin distant formada göstərilməsi və bunun üçün zəruri texniki
bazanın mövcudluğunun bu günün ehtiyacı olduğunu qeyd etmişdir.
Çıxışının sonunda Anar Bağırov Caspian European Club-un üzv şirkətlərinin rəhbər və nümayəndələrinin suallarını cavablandırıb və təkliflərini dinləyib.
Caspian European Club-un sədri və baş icraçı direktoru Telman Əliyev
açıq və səmimi dialoqa görə Caspian European Club-un üzv şirkətlərinin
top-menecerləri adından Anar Bağırova minnətdarlığını bildirib. Həmçinin
Caspian European Club və Azərbaycan Respublikasının Vəkillər Kollegiyası
arasında birgə ictimai nəzarət şurasının yaradılması təklifi üçün təşekkür
edib.
İlk dəfə keçirilən Online Round Table – konkret sahə və sahəarası təkliflərin
və problemlərin müzakirəsi üçün Azərbaycan, Gürcüstan və Qazaxıstanda Caspian
European Club tərəfindən hər həftə keçirilir.
Biznes-netvorkinq üçün beynəlxalq platforma olan Caspian European Club mütəmadi olaraq CEO Brunch, CEO Lunch, Business Tour və s. kimi müxtəlif tədbirlər təşkil edir. Onlayn biznes-treninqlər çərçivəsində yerli və xarici mütəxəssislərlə vebinarlar, treninq və seminarlar keçirilir. Caspian European Club-un mənzil-qərargahı Bakıda (Azərbaycan) yerləşir. Caspian European Club-un, həmçinin Gürcüstan və Qazaxıstanda rəsmi nümayəndəlikləri, eyni zamanda dünyanın bir sıra ölkələrində səlahiyyətli nümayəndələri var.
www.anews.az
Bizi sosial şəbəkələrdə izləyin !