Məzahir Pənahovun oğlu həyat yoldaşını ölümlə hədələyir - haqqın.az

Haqqin.az redaksiyasına qadın zorakılığı ilə üzləşən qadın müraciət edib. O, məişət zorakılığına məruz qaldığını bildirib. Onun sözlərinə görə, zorakılığı törədən şəxs Azərbaycan Mərkəzi Seçki Komissiyasının sədri Məzahir Pənahovun oğlu Məhəmməd Pənahov olub.

Zorakılıq hadisəsi ABŞ-da baş verib və qadın yalnız Azərbaycana qaçaraq canını qurtara bilib.

38 yaşlı H.P. 2022-ci il iyunun 28-də Bakıda Məhəmməd Pənahovla evlənib və cütlük daha sonra Los-Ancelesə köçüb. Bu vaxta qədər işləməyən Pənahov 2.035.400 dollar dəyərində dəbdəbəli Bel-Air villası alıb (haqqin.az redaksiyası villanın Pənahovlar ailəsinin adından qeydiyyatdan keçmiş Alphaand Export FZ-LLC şirkəti vasitəsilə alındığını təsdiqləyən sənədlərə malikdir).

Cütlüyün maliyyə problemi olmayıb.Onlar Birləşmiş Krallıq, BƏƏ və ABŞ banklarındakı hesablarından milyonlarla pul xərcləyiblər. Haqqin.az-ın əldə etdiyi məlumata görə, bu hesablara mütəmadi olaraq atası tərəfindən vəsait köçürülüb.

Lakin dəbdəbəli həyat Məhəmməd Pənahovun yenidən alkoqol asılılığına qayıtması ilə kabusa çevrilib. Həyat yoldaşının dediyinə görə, o, bir oturumda 26 butulka pivə içə bilərdi və sonra hamilə qadına boş butulkalar atırdı. Qarabasmalar və ağlını itirmə hallarından sonra aqressiv davranır, qadına qarşı zorakılıq tətbiq edib. Bu döyülmələrdən birində qadın uşağını itirib.

Evləndikdən 17 ay sonra H.P. Kaliforniyadakı villadan qaçaraq Bakıya dönüb. Qohumları ona Kaliforniya polisi ilə əlaqə saxlamağı tövsiyə etsələr də, o, xilası Azərbaycana qayıtmaqda görüb.

Lakin Pənahovun təhdidləri Bakıda da davam edib. O, qadına gündəlik zəng edərək onu ölümlə hədələyib. H.P. Binəqədi Rayon Məhkəməsinə boşanma iddiası ilə müraciət edib.