Simonyan xalqını Azərbaycan məhsullarının erməni bazarlarında görünməsi ilə barışmağa çağırıb

Ermənistan bazarlarında Azərbaycan məhsulları, Azərbaycan  bazarlarında isə erməni məhsulları görünəcək, əvvəllər olduğu kimi ermənilər və azərbaycanlılar yanaşı yaşayacaqlar. Bunu  Ermənistan parlamentinin spikeri Alen Simonyan  mayın 29-da öz Telegram kanalında yazıb.

“Mən başa düşürəm ki, azərbaycanlılar mənim ermənilərin bir gün Bakıya qayıdıb orada yaşamalı olduqları barədə sözlərimi ağır qəbul edib. Amma qəribədir ki, bu reaksiyanı bir vaxtlar Qarabağdan qaçan keçmiş məmurlar, zibil qutularında qurdalanan pişikləri, özləri ilə bir avtobus tərəfdar daşıyanlar, məşhur feysbuk fahişələri və köçəryan-serj zooparkında qalmış heyvanlar verir",    o yazıb.

O həmçinin Qarabağ erməniləri kimi  Bakıda və ya Sumqayıtda yaşamış ermənilərin  də  evlərinə qayıtmaq hüququnun olduğunu deyib. 

"Sülh bağlandıqdan sonra biz Türkiyə və ya Azərbaycanla ticarət etməməliyik? Yoxsa sərhədləri biz də bağlayaq? Minlərlə erməni Gürcüstanda, Rusiyada və digər ölkələrdə ticarət edib və indi də edir.  Yoxsa düşünürsünüz ki, biz blokadada qalmalıyıq, nə nəqliyyat, nə yük, nə qaz, nə də elektrik Ermənistandan keçməsin?", - Simonyan vurğulayıb.

O həmçinin qeyd edib ki, "Ermənistan və Azərbaycan dinc şəraitdə yaşayacaq, bir-biri ilə ticarət edəcək, müharibə olmayacaq, sülh olacaq”.