Qarabağ suvarma kanalının yenidən qurulması üzrə İşçi qrupun növbəti iclası keçirilib

Qarabağ suvarma kanalının yenidən qurulması ilə bağlı yaradılmış İşçi qrupun növbəti onlayn iclası keçirilib. Bu barədə Azərbaycan Dövlət Su Ehtiyatları Agentliyi məlumat yayıb.

İclasda 1958-ci ildən istismarda olan, uzunluğu 172,4 km, normal su sərfi 113 m³/san olan Qarabağ suvarma kanalının mövcud vəziyyəti və yenidən qurulmasının zəruriliyi müzakirə olunub.

Agentliyin rəsmisi Rafiq Aslanov bildirib ki, kanal Mingəçevir su anbarından başlayaraq 1 şəhər və 8 rayonda 115 min hektara yaxın əkin sahəsini suvarma, əhalini isə içməli su ilə təmin edir. Yay aylarında Araz çayındakı su çatışmazlığı dövründə 25-30 m³/san su Bəhramtəpə hidroqovşağına ötürülür, bu da əlavə 5 rayonda su təminatının yaxşılaşdırılmasına şərait yaradır.

Bildirilib ki, kanaldan sızan sular torpaqaltı suların səviyyəsini artıraraq ərazilərin şorlaşmasına səbəb olub. Bunun qarşısını almaq məqsədilə kollektor-drenaj şəbəkəsi yaradılıb.

İclasda layihənin texniki-iqtisadi əsaslandırması və alternativ variantlar təqdim olunub, iştirakçıların rəy və təklifləri dinlənilib. Görülən işlərin əlaqələndirilmiş şəkildə davam etdirilməsi üçün texniki-iqtisadi əsaslandırmanın təkmilləşdirilməsi qərara alınıb.