Deputat hesab edir ki, dövlət qulluğunda şəffaflıq və ədalət prinsipi yoxdur

Yeni qanun layihəsi dövlət xidmətlərinin şəffaflığını və vətəndaş yönümlülüyünü artırmağa yönəlib, lakin bu məqsədlərə çatmaq üçün dövlət qulluqçusu anlayışına da yenidən baxılmalıdır. Bunu Milli Məclisin deputatı Razi Nurullayev bildirib.

“Qanunlar mexanizmdir, amma bu mexanizmi hərəkətə gətirən dövlət qulluqçusunun vicdanı və peşəkarlığıdır,” — deputat qeyd edib.

Nurullayevin sözlərinə görə, dövlət qulluğuna qəbul prosesində ədalətsizlik və qeyri-şəffaflıq ictimai inamı zədələyir.

“Çox sayda gənc yüksək bal toplasa da, işə qəbul oluna bilmir. Bu, fərdi yox, sistemli problemdir. Dövlət xidməti biliyə deyil, tanışlığa əsaslandıqda, gənclərin inamı sarsılır", - o bildirib.

O vurğulayıb ki, imtahanı müvəffəqiyyətlə keçən hər bir namizədin yerləşdirilməsi üçün şəffaf mexanizm yaradılmalı və müsahibə mərhələsində subyektiv yanaşmalara son qoyulmalıdır.

Gülnar Nazimqızı