Bakı metrosunda texniki nasazlıq səbəbindən qatar intervalında gecikmələr yaranıb/Yenilənib

"Nərimanov" elektrik deposu yollarına yüksək gərginlikli enerjinin verilməsi tam bərpa olunub. Hazırda "Bakmil" stansiyası fəaliyyətini tam bərpa edib. Bu barədə "Bakı Metropoliteni" QSC-dən məlumat verilib.

Qeyd olunub ki, Yaşıl və Qırmızı xətlərdə qatarlararası intervallar qrafikə uyğun bərpa edilib. Qrafik üzrə 34 cüt/saat prinsipi ilə qatarlar fəaliyyət göstərir.

07:26

Bakı Metropoliteni “Nərimanov” elektrik deposunun yol sahələrində yüksək gərginliyin verilməsində baş verən qısamüddətli fasilə səbəbindən Qırmızı və Yaşıl xətlərdə qatarların hərəkət intervalında gecikmələrin müşahidə olunduğunu bildirib.

Məlumata görə, “Bakmil” stansiyasının fəaliyyəti də məhdudlaşdırılıb.

Qurum texniki xidmətin enerji təminatının bərpası üçün operativ şəkildə iş apardığını qeyd edib və vəziyyət tam normallaşdıqdan sonra əlavə məlumat veriləcəyini bildirib.
Metropoliten sərnişinlərdən yaranmış narahatlığa görə üzr istəyib.