İran nömrələri ilə uşaqlara yazıb narkotik təklif edildiyi iddia olunur

Sosial şəbəkələrdə bir valideyn övladına İran nömrələri vasitəsilə yazılaraq narkotik maddə təklif edildiyini bildirib.

Valideyn paylaşımında xüsusilə yeniyetmələri belə tələlərə düşməməyə çağırıb.

Məsələ ilə bağlı Daxili İşlər Nazirliyi dəfələrlə vətəndaşlara müraciət edərək xəbərdarlıq edib. Aparılan araşdırmalar xarici nömrələr, saxta profillər və bəzi sosial media kanallarının müəyyən xarici dairələrdən idarə olunduğunu göstərir.

Məlumata görə, narkotik şəbəkələri bu üsuldan istifadə edərək əsasən narkotik aludəçilərini əməkdaşlığa cəlb etməyə və onların asılılıq vəziyyətindən yararlanaraq narkokuryer fəaliyyətinə yönləndirməyə çalışırlar.

DİN bildirir ki, bu kimi halların qarşısının alınması üçün hər bir sosial media istifadəçisi, xüsusilə də valideynlər diqqətli olmalı, övladlarının onlayn fəaliyyətinə nəzarət etməli və şübhəli hallar müşahidə edildikdə dərhal polisə məlumat verməlidirlər