Sosial mediada milli təhlükəsizlik və əxlaq normalarının qorunması qanun layihəsinin əsas məqsədidir Deputat

Milli Məclisin 19 dekabr iclasında müzakirə olunan yeni qanun layihəsi ifadə azadlığına qarşı deyil, ictimai mənəviyyat, sosial davranış normaları və milli təhlükəsizliyin qorunmasına xidmət edir. Bunu deputat Zahid Oruc deyib. 

Oruc qeyd edib ki, deputatlar Azay Quliyev və Razi Nurullayev layihəni müdafiə edərək, onun cəmiyyətin tələbi olduğunu vurğulayıblar. Layihə sosial şəbəkələrdə Azərbaycan xalqını və dövlətini təhqir edən xarici və daxili şəxslərə, habelə qlobal şirkətlərin ölkədə nümayəndəliklərinin yaradılmasına və birgə mübarizə imkanlarına da şamil edilir.

Deputat bildirib ki, qanun layihəsi rəqəmsal asılılıq, rəqəmsal manipulyasiya, rəqəmsal klonlaşdırma və alqoritmik təhlükəsizlik kimi müasir anlayışları qanunvericiliyə gətirməyi nəzərdə tutur.

“Sosial mediada qeyri-əxlaqi kontentlərin yayılması yalnız fərdi pozucu davranış deyil, təşkilatlanmış şəbəkədir. İnsan alveri, cinsi istismar və qeyri-qanuni vasitəçilik kimi fəaliyyətlər ciddi hüquqi boşluqlar yaradır”, – Oruc əlavə edib.

Onun sözlərinə görə, 2025-ci ilin statistikasına əsasən, ölkədə internet istifadəçilərinin 71%-dən çoxu sosial şəbəkələrə daxil olur, gənclər və yeniyetmələrdə göstərici 85%-ə yaxınlaşır. TikTok və Telegram kimi platformalarda məzmun istehlakı 2024–2025-ci illərdə orta hesabla 25–30% artıb.

Oruc vurğulayıb ki, qeyri-əxlaqi kontent artıq telefon ekranlarında, sosial qruplarda və algoritmlərin nüvəsində formalaşır və milli təhlükəsizliyə təsir göstərir. Fransa və Almaniyada belə hallar üçün inzibati cərimələr və 3–5 ilədək azadlıqdan məhrumetmə tədbirləri tətbiq olunur.

Deputat parlamenti layihəyə müsbət səs verməyə çağırıb, layihənin kibervətənimizin qorunmasına xidmət edəcəyini bildirib.

Gülnar Nazimqızı