ASCO-nun “Murovdağ” gəmisi Türkiyədə əsaslı təmirdən sonra istismara qaytarılıb

AZCON Holding-ə daxil olan ASCO-nun “Handysize” tipli “Murovdağ” gəmisi Türkiyənin “Özata” tərsanəsində əsaslı təmir edildikdən sonra yenidən istismara qaytarılıb. Bu barədə şirkət məlumat yayıb.

Təmir işləri Beynəlxalq Təsnifat Cəmiyyətləri Assosiasiyasının üzvü olan “RINA” Təsnifat Cəmiyyətinin nəzarəti altında aparılıb. Əsas və köməkçi mühərriklər, mexaniki və texniki sistemlər təmir edilərək tam testdən keçirilib.

ASCO bildirib ki, Balast Sularının İdarəetmə Sistemi üzrə beşillik təmir planı icra olunub və sistem ABŞ sularında istismar üçün modifikasiya edilib. Bu, gəmiyə dünya üzrə bütün sularda balast əməliyyatlarını məhdudiyyətsiz həyata keçirməyə imkan verir.

Beynəlxalq konvensiyaların tələblərinə uyğun olaraq yükqaldırma qurğuları, naviqasiya və emissiyalara nəzarət sistemləri yoxlanılıb və tam işlək vəziyyətdə olduğu təsdiqlənib. Gəminin göyərtəsi və anbar sahələri yenilənib, sualtı hissə mühafizəedici boya ilə örtülüb.

38 min ton yükgötürmə qabiliyyətinə malik “Murovdağ” gəmisinin ilk səfəri təmirdən sonra Misirdən ABŞ-yə planlaşdırılır. Gəminin maksimum sürəti 15,7 uzeldir.