Bakıda 100-ə yaxın həkim TƏBİB tərəfindən ixtisar olunduğuna etiraz edir-Yenilənib- Video

TƏBİB stomatoloqların ixtisar olunması faktını təsdiq edib. Bu barədə qurum anews.az-ın sorğusuna cavab olaraq bildirib. 

"Son dövrlərdə stomatoloji xidmətlərin təşkili və şəffaflığın artırılması məqsədilə aparılan geniş təhlillər zamanı müxtəlif regionlarda stomatoloqların xidmət həcmi, iş yükü və real ehtiyac göstəriciləri araşdırılıb. Təhlillər nəticəsində bəzi stomatoloji xidmətlərin faktiki tələbatdan artıq olduğu, mövcud resursların qeyri-səmərəli istifadə edildiyi, ödənişlərin tam şəkildə nağdsız qaydada rəsmiləşdirilməməsi səbəbindən büdcə daxilolmalarının azaldığı müəyyən edilib", - məlumatda deyilir. 

TƏBİB həmçinin bildirib ki, bəzi regionlarda stomatoloqların sayının real ehtiyacı üstələməsi əlavə maliyyə yükünün yaranmasına səbəb olub.

"Araşdırmalar göstərmişdir ki, stomatoloji xidmətlərin göstərilməsi zamanı istifadə olunan maddi resurslar (işçi heyəti üzrə əməkhaqqı xərcləri, avadanlıqların saxlanması, dərman və sərfiyyat materialları, kommunal xərclər və s.) bu xidmət üzrə əldə edilən maliyyə gəlirlərini üstələyir. Bunun nəticəsində stomatoloji xidmətlərin mövcud şəraitdə əvvəlki həcmlərdə davam etdirilməsi iqtisadi cəhətdən səmərəli hesab edilmir və bu sahədə əlavə optimallaşdırma tədbirlərinin görülməsi zərurəti yaranıb", - açıqlamada deyilir. 

****

Ölkədə fəaliyyət göstərən 100-ə yaxın stomatoloq TƏBİB-in binası qarşısında etiraz aksiyası keçirib. Bu barədə görüntülər sosial şəbəkələrdə yayılıb. 

Onlar iddia edirlər ki, hər hansı əsas olmadan ixtisar edilərək işdən çıxarılıblar.

Məsələ ilə bağlı TƏBİB-ə sorğu göndərilib, lakin qurum hələlik rəsmi cavab verməyib. 

Aytac