Yeni metrolar nələri dəyişəcək?

Bakı və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı çərçivəsində 10 stansiya üzrə mərhələli işlər aparılır. Bunu “Bakı Metropoliteni” QSC-nin mətbuat xidmətinin rəhbəri Bəxtiyar Məmmədov Azərbaycan televiziyasına müsahibəsində deyib. 

O bildirib ki, stansiyalardan biri “Nizami”, digəri isə “Sahil” metro stansiyalarının yaxınlığında inşa olunacaq.

Planlara əsasən, növbəti stansiya “Port Baku” kimi tanınan ərazinin yaxınlığında yerləşəcək.

Bundan əlavə, “Xətai” stansiyasında əlavə keçid və Babək prospekti üzərində yeni stansiya tikintisi də nəzərdə tutulur.

Yaşıl xətt üzrə inkişaf planlarına görə isə “Xətai”dən sonrakı stansiyalar Nizami Gəncəvi adına parkın yaxınlığında və “Ağ Şəhər” layihəsinin inkişaf etməkdə olan hissəsində yerləşəcək.

Həmçinin Nargilə dairəsi və ya keçmiş Bakı Avtomobil Zavodu ərazisində daha bir stansiyanın tikintisi gündəmdədir.

Milli Məclisin deputatı Fazil Mustafa bildirir ki, Bakı metrosunda yeni stansiyaların tikintisinin dayanması son dövrlərdə nəqliyyat problemlərini dərinləşməsinə gətirib çıxarıb.

“Bakıxanov qəsəbəsi üzrə məsələni dəfələrlə qaldırmışam. Seçildiyim ərazinin ən böyük problemi metro stansiyalarının açılması ilə bağlıdır”,- o bildirib.

Nəqliyyat eksperti Rauf Ağamirzəyevin fikrincə  isə, metro tikintisi şəhərin uzunmüddətli inkişaf planlarına əsaslanaraq aparılmalıdır.

Onun sözlərinə görə, Bakının şərq və qərb istiqamətlərində metronun şəbəkə üzrə tamamlanması konseptual planda nəzərdə tutulub.

“Metro çox bahalı infrastruktur layihəsidir. Amma elə layihələr var ki, qiymətindən asılı olmayaraq həyata keçirilməlidir. Ən vacib məsələlərdən biri Bakının dairəvi dəmir yolunun tam başa çatdırılmasıdır. Mövcud plana əsasən, bu layihə 2030-cu ilə qədər yekunlaşmalıdır”, – ekspert qeyd edib.

Ağamirzəyev əlavə edib ki, Bakıda metro ilə yanaşı, yerüstü metro funksiyasını yerinə yetirən dəmir yolu xətləri də mövcuddur ki, bəzi istiqamətlərdə onların bərpası və genişləndirilməsi planlaşdırılır.

Məsələ ilə bağlı “Bakı Metropoliteni” QSC bildirib ki, hazırda digər yeni stansiyaların tikintisinə başlanılması nəzərdə tutulmur. Bu, davam edən layihələrin böyük həcmli olması ilə izah edilir.

Prezident İlham Əliyev 2025-ci il yanvarın 30-da “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nın təsdiq edilməsi haqqında sərəncam imzalayıb.

Bakı metrosu 1967-ci ildə istifadəyə verilib.  Metro 3 əsas xətdən ( qırmızı, yaşıl və bənəvşəyi) ibarətdir. Bakıda  40-dan çox  metro stansiyası fəaliyyət göstərir.

Aytac Zeynalova