Futbola görə metro gecə 1-dək işləyəcək

“Bakı Metropoliteni” QSC yanvarın 21-də “Qarabağ” Futbol Klubunun UEFA Çempionlar Liqası oyunu ilə əlaqədar dəyişdirilmiş iş rejimində fəaliyyət göstərəcək.

AFFA-nın müraciəti və metropolitenin mədəni-kütləvi tədbirlərlə əlaqəli əməliyyat planına uyğun olaraq, stansiyalarda iş saatı uzadılacaq. Tofiq Bəhramov adına Respublika stadionunda keçiriləcək oyuna azarkeşlərin sayı nəzərə alınaraq, bütün stansiyalar yanvarın 21-dən 22-nə keçən gecə saat 01:00-dək sərnişinlərin girişinə açıq olacaq.

Stansiyalar gücləndirilmiş rejimdə çalışacaq, əlavə işçi qüvvəsi cəlb olunacaq. Qarşılaşmadan sonra sərnişinlərin təhlükəsiz və rahat daşınması üçün “Gənclik”, “28 May” və “Nərimanov” stansiyalarında xüsusi nəzarət tədbirləri görüləcək.

Gün ərzində qatarlar payız-qış qrafikinə uyğun hərəkət edəcək, ehtiyat qatarlar xəttə buraxılmaq üçün hazır saxlanılacaq.