Planetin “ağciyərləri” təhlükə altındadır - beynəxalq meşələr günü...

Bu gün dünyada Beynəlxalq Meşələr Günü qeyd olunur. Günün təsis olunması ideyası 1971-ci ildə irəli sürülüb, daha sonra Birləşmiş Millətlər Təşkilatı tərəfindən 2012-ci ildə rəsmən təsdiqlənib.

Bu il Beynəlxalq Meşələr Günü “Meşələr və iqtisadiyyatlar” mövzusu ilə keçirilir və əsas məqsəd meşələrin qorunmasının vacibliyinə diqqət çəkməkdir.

Statistikaya görə, son 10 min ildə dünyada təxminən 26 milyon kvadrat kilometr meşə sahəsi məhv edilib. Hazırda Yer kürəsində meşələr quru sahəsinin təxminən üçdə birini təşkil edir. Buna baxmayaraq, hər saniyə 1,5 hektardan çox meşə sahəsi itirilir.

Meşələr yalnız ekoloji deyil, həm də sosial və iqtisadi baxımdan həyati əhəmiyyət daşıyır. Dünyada 5 milyarddan çox insan qida, dərman və dolanışıq üçün meşələrdən asılıdır, 1,6 milyard insan isə gündəlik həyatını birbaşa meşə resursları hesabına təmin edir.

Azərbaycanda isə meşə fondu ümumi ərazinin 14 faizini təşkil edir. Meşələrin böyük hissəsi Böyük və Kiçik Qafqaz dağları ilə Talış zonasında yerləşir və iqlim dəyişikliklərinin qarşısının alınmasında mühüm rol oynayır.

Mütəxəssislər bildirir ki, meşələrin qırılması, yanğınlar və qanunsuz istifadə qlobal miqyasda ciddi ekoloji təhlükə yaradır. Bu səbəbdən də beynəlxalq təşkilatlar və dövlətlər meşələrin qorunması üçün birgə tədbirlərin gücləndirilməsinə çağırır.