“Əgər ermənilərin azərbaycanlılara qarşı 1918-ci ildə həyata keçirdiyi soyqırımının şahidi olan Quba məzarlığında ciddi işlər görülməzsə, yaz ayına kimi məzarlıq dağılacaq”.Bunu APA-ya açıqlamasında Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutunun aparıcı elmi işçisi, Quba Memorial Xatirə Kompleksində həyata keçirilən tikinti işlərinin nəzarətçi-tədqiqatçısı Qəhrəman Ağayev deyib.  Onun sözlərinə görə, Arxeologiya və Etnoqrafiya İnstitutu tərəfindən məzarlıqda sümüklərin çürüməməsi üçün müvafiq işlər görülür. Amma məzarlıqda vəziyyətin çox acınacaqlı olduğunu deyən Q.Ağayev 20 gün öncə gördüklərinə əsasən, orada dəhşətli çürümə prosesinin getdiyini vurğulayıb: “Torpağın özündə nəmişlik yaranıb, sümüklər açdığımız quyudan artıq yerə tökülür. Biz onun müəyyən qədər qarşısını almışıq. Amma bunlar kifayət deyil. Həmin quyunun yaza çıxıb-çıxmayacağı sual altındadır”. Q.Ağayev qeyd edib ki, məzarlıqda aparılan tədqiqatlar nəticəsində azərbaycanlılara qarşı törədilmiş soyqırımı zamanı aşkarlanan insan cəsədləri ilə doldurulmuş 2 arx olduğu kimi yerində qalıb: “Amma quyulardan biri 2007-ci ildə sürüşmə nəticəsində dağılıb, ikinci quyunu isə saxlamaq mümkün olub. Hazırda isə ikinci quyu təhlükə qarşısındadır. Quyunun əvvəllər dərinliyi 4 metr 20 santimetr idisə, bu gün 2 metr 20 santimetr olub. Onun yarısı artıq məhv olub. Bunu mütləq qoruyub saxlamaq lazımdır, əks təqdirdə heç kimə sübut edə bilməyəcəyik ki, azərbaycanlılara qarşı belə bir soyqırımı olub”. Q.Ağayev qeyd edib ki, kompleksdə tikinti işlərinin ikinci mərhələsinin noyabrda başlanacağı deyilsə də, hələlik bu prosesə start verilməyib: “Heç başlamayacaq da. Çünki qış fəslində orada hər hansı bir işin başlanması mümkün deyil. Quba şimal zonasında olduğundan qış fəsli burada çox soyuq olur. Ona görə də bu proseslər çox güman ki, yaza qalacaq. Yaza kimi isə quyu salamat qalsa, böyük iş olar. Əgər orada müəyyən ciddi tədbirlər görülməsə, yaz ayına kimi məzarlıq dağılacaq”.ANN.Az