İspaniyada çərşənbə günü 23 nəfərdə "meymun çiçəyi” xəstəliyinin əlamətlərinin aşkarlanması barədə məlumat açıqlanıb. Portuqaliyada bu xəstəliyə tutumaqda şübhəli bilinənlərin sayı 15-dir. Böyük Britaniyada da iki yeni "Meymun çiçəyi” ştammı aşkar edilib. Ölkədə yoluxanların ümumi sayı isə 9-a çatıb.
Bununla belə mütəxəssislər, xəstəliyinin yayılma intensizliyinin elə də sürətli olmadığını bildirir.
Baş infeksionist Cəlal İsayevin sözlərinə görə, "meymun çiçəyi" insanlar arasında adətən az və nadir görünən xəstəlikdir.
"Bu xəstəlik ilk dəfə 1958-ci ildə Afrika ölkələrində meymunlar arasında müşahidə edilib. Buna görə də xəstəliyə "meymun çiçəyi” adı verilib. Sonradan bəlli olub ki, xəstəlik insanlara da keçə bilir. Amma meymundan insana keçməsi halına çox az rast gəlinir. Bu xəstəliyə daha çox uşaqlar yoluxur. Öz fəsadlarına görə çiçək xəstəliyini xatırladır. Ölüm faizi koronavirusla müqayisədə bir qədər yüksəkdir. Çiçək xəstəliyinə qarşı immunitet qazanmış insanlar bu xəstəliyi daha yüngül keçirir", - İsayev bildirib.
Onun fikrincə, Avropa ölkələrində azsaylı yoluxmalar baş versə də, Azərbaycanda yayılması və pandemiya yaartması ehtimalı ilə bağlı dəqiq proqnoz vermək çətindir.
"Çünki, biz ilkin dönəmlərdə koronavirusun pandemiyaya çevriləcəyini dəqiq bilmirdik. Amma biz sonradan nə qədər insanın tələf olmasının şahidi olduq”, - İsayev bildirib.
Afrika ölkələrindən sonra "Meymun çiçəyi” xəstəliyinə ilk dəfə 2003-cü ildə ABŞ-da rast gəlinib. Xəstəlik insanlara çöl itlərindən keçib və ümumilikdə 81 yoluxma halı qeydə alınıb.
Cavanşir Qasımov
www.anews.az
Bizi sosial şəbəkələrdə izləyin !
