BTC ilə 2025-ci ilin birinci rübündə 7 milyon ton neft ixrac olunub

2025-ci ilin birinci rübündə Bakı-Tbilisi-Ceyhan (BTC) boru kəməri vasitəsilə təxminən 7 milyon ton (54 milyon barel) xam neft və kondensat ixrac olunub. Bu həcmlər Ceyhan terminalında 70 tankerə yüklənərək dünya bazarlarına göndərilib. Bu barədə layihənin operatoru bp məlumat yayıb.

1768 kilometr uzunluğunda olan BTC boru kəməri 2006-cı ilin iyununda istismara verilib. İndiyədək bu xətt vasitəsilə 598 milyon ton (4,5 milyard bareldən çox) xam neft nəql olunub və 5932 tankerə yüklənərək ixrac edilib.

Birinci rübdə əməliyyat xərcləri təqribən 32 milyon ABŞ dolları, əsaslı xərclər isə 13 milyon dollar təşkil edib.

BTC hazırda əsasən AÇG yatağından hasil olunan nefti və Şahdəniz kondensatını daşıyır. Bundan başqa, boru kəməri ilə Qazaxıstan və Türkmənistandan, eləcə də SOCAR-ın Azərbaycanda hasil etdiyi digər neft həcmləri də nəql olunur.

BTC Ko. şirkətində iştirak payları belə bölünür:

SOCAR – 32,97%

bp – 30,10%

MOL – 8,90%

TPAO – 6,53%

Eni – 5,00%

TotalEnergies – 5,00%

ITOCHU – 3,40%

ONGC Videsh – 3,10%

ExxonMobil – 2,50%

INPEX – 2,50%

Aytac Zeynalova