Şahdəniz yatağından 3 ayda 7 milyard kubmetr qaz hasil olunub

2025-ci ilin ilk rübündə “Şahdəniz” yatağından ümumilikdə təxminən 7 milyard standart kubmetr qaz və 1 milyon ton (təqribən 8 milyon barel) kondensat hasil olunub. Bu barədə bp şirkətinin yaydığı hesabatda bildirilir.

Hasil olunan qaz SOCAR, GOGC, BOTAŞ, eləcə də Avropa bazarları və BTC kəməri üçün çatdırılıb. Hazırda Şahdəniz qurğularının illik hasilat gücü 27,9 milyard kubmetr təşkil edir.

Rüb ərzində “Şahdəniz” üzrə əməliyyat xərcləri 726 milyon dollar, əsaslı xərclər isə 213 milyon dollar olub. Xərclərin əsas hissəsi Şahdəniz 2 layihəsinə aiddir.

2025-ci ilin birinci rübündə Şahdəniz 2 çərçivəsində qərb-cənub cinahında beşinci quyu işə salınıb, digər quyularda sualtı işlər davam edib. “Xankəndi” sualtı tikinti gəmisi layihənin əsas texniki dəstək vasitəsi kimi fəaliyyət göstərməkdə davam edir.

Qazma əməliyyatları zamanı:

"İstiqlal" qazma qurğusu qərb-cənubda SDF02 və SDF04 quyularında çalışıb,

"Heydər Əliyev" qazma qurğusu qərb cinahında SDD05 quyusunu tamamlayaraq, şərq-şimalda SDH04 quyusuna başlayıb.

Şahdəniz 2 çərçivəsində ümumilikdə 22 quyu qazılıb.

Şahdəniz layihəsində iştirak payları:

bp (operator) – 29,99%

LUKOYL – 19,99%

TPAO – 19,00%

Cənub Qaz Dəhlizi – 16,02%

NİKO – 10,00%

MVM – 5,00%

N.Təbrizli