Qeyri-iş günlərində Azərbaycanda 4,5 mindən çox sığorta hadisəsi qeydə alınıb

2026-cı il martın 20-dən 30-dək olan dövrdə ümumilikdə 4 576 müraciət qeydə alınıb. Bu barədə Azərbaycan Sığortaçılar Assosiasiyası məlumat yayıb. 

Statistikaya əsasən, hadisələrin böyük hissəsi avtomobil sahəsinə aiddir. Belə ki, avtonəqliyyat vasitəsi sahiblərinin mülki məsuliyyətinin icbari sığortası üzrə 3 636 hadisə baş verib.

Kasko sığortası üzrə 651, daşınmaz əmlakın icbari sığortası üzrə 210, əmlakın yanğın və digər risklərdən sığortası üzrə isə 80 hadisə qeydə alınıb.

Məlumata görə, 4 045 hadisə üzrə ehtimal olunan ümumi zərər məbləği 6 057 025 manat təşkil edir.

Regional bölgüyə əsasən, hadisələrin 77%-i Bakı şəhərinin, 23%-i isə şimal bölgəsinin payına düşür.

Gülnar Nazimqızı