AMB 2026-cı il üzrə inflyasiya proqnozunu 5,9%-ə qaldırıb

Azərbaycan Mərkəzi Bankı 2026-cı ilin sonuna illik inflyasiya proqnozunu 5,9%-ə yüksəldib.

Bu barədə Mərkəzi Bankın sədri Taleh Kazımov bildirib.

Onun sözlərinə görə, bu göstərici fevral proqnozu ilə müqayisədə 0,4 faiz bəndi yuxarı revizə olunub. 2027-ci il üzrə illik inflyasiya proqnozu isə 4,5% müəyyən edilib ki, bu da əvvəlki proqnozdan 0,5 faiz bəndi çoxdur.

Kazımov bildirib ki, 2026-cı ilin mart ayında Azərbaycanda illik inflyasiya 5,6% təşkil edib. Ərzaq inflyasiyası 6,5%, qeyri-ərzaq inflyasiyası 3,7%, xidmətlər üzrə inflyasiya isə 5,7% olub. Martda illik baza inflyasiyası 5,5% səviyyəsində formalaşıb.

AMB sədrinin sözlərinə görə, inflyasiya proqnozunun artırılması əsasən təklif amilləri ilə bağlıdır. Bunlara Yaxın Şərqdə hərbi gərginliyin yaratdığı logistik təsirlər, ticarət tərəfdaşlarında qiymət artımları, Türkiyədə inflyasiya və kənd təsərrüfatı istehsalçı qiymətlərinin yüksəlməsi daxildir.

Kazımov qeyd edib ki, Mərkəzi Bank orta müddətdə inflyasiyanın hədəf diapazonunda qalacağını gözləyir.

N.Təbrizli