Azərbaycanda son dövrlərdə familiyalarını milliləşdirən şəxslər daha çox -lı, -li, -lu, -lü və - zadə soyad sonluqlarından istifadə ediblər. Bunu Trend-ə Nazirlər Kabineti yanında Terminologiya Komissiyasının sədr müavini Sayalı Sadıqova deyib.
Azərbaycanda sovet dövründə bütün soyad sonluqlarının "-ov", "-yev" olduğunu deyən S.Sadıqova bildirib ki, 2011-ci ildə Azərbaycan Milli Elmlər Akademiyası Rəyasət Heyətinin təsdiqlədiyi qərarla soyad sonluqlarının dəyişdirilməsi üçün 5 variant tövsiyə edilib. Həmin variantlar valideynin soyadını bildirən sözün kökünə və ya soyad tərkibinin hər hansı tərkib hissəsinə -lı, -li, -lu, -lü, - zadə, -gil, -soy, kişilərə -oğlu, qadınlara -oğlu və ya -qızı soyad sonluğun artırılması təklif olunub: "Hesablamalara görə, ən çox istifadə olunan -lı, -li, -lu, -lü və - zadə soyad sonluqlarıdır. Bunlara olan maraq bərabər səviyyədədir. Ancaq təəssüflə bildirmək istəyirəm ki, son dövrlərdə soyad sonluqlarının milliləşdirilməsi zamanı -lı, -li, -lu, -lü və - zadə formasına daha çox üstünlük verilsə də, -soy, -gil-dən az istifadə edilir".
Soyadların milliləşdirilməsinin qarşıya qoyulan əsas işlərdən biri olduğunu deyən S.Sadıqova bildirib ki, soyad sonluqların dəyişdirilməsi məcburi deyil. Yenidoğulan uşaqların əksəriyyətinin soyadları milliləşdirilmiş formada olur. Onların da soyadları üçün əsasən, -lı, -li, -lu, -lü, oğlu, qızı, zadə sonluqlarından istifadə edilir.
S.Sadıqova onu da bildirib ki, bu gün Azərbaycanda valideynlərin 50-60 faizi yeni doğulmuş övladlarına valideynləri ilə məsləhətləşərək yaxınlarının adını daşıyan, xatirə adlar qoyurlar. Valideynlərin təxminən 30-40 faizi Ədliyyə Nazirliyinin Vətəndaşlıq vəziyyəti aktlarının dövlət qeydiyyatı şöbələrindəki adlar siyahısından istifadə edir.
ANN.Az
