Ermənistanın Gömrük İttifaqına qoşulması ilə bağlı Azərbaycanın ittifaqa rəsmi etiraz göndərməsindən sonra Qazaxıstan və Qırğızıstan da prezident səviyyəsində öz etirazını bəyan etdi. Qırğızıstan prezidenti daha radikal münasibət sərgiləyərək “Bunun hesabını qırğız xalqına və türk elinə verə bilmərik” - dedi. Hələ Qazaxıstanın Dağlıq Qarabağ problemi ilə bağlı Ermənistanın sərhəd məsələsini gündəmə gətirməsi erməni rəhbərliyinin təşvişi açıq şəkildə özünü biruzə vermişdi. Azərbaycanın etirazı və Qırğızıstanın konkret mövqeyi gedişatla bağlı nəyi dəyişə bilər?ANN.Az-a açıqlamasında politoloq Qabil Hüseynli Ermənistanın Gömrük İttifaqına alınmasını və Rusiyanın bu istiqamətdə siyasi maraqlarının necə olacağını şərh edib.Q.Hüseynli bildirib ki,  Rusiya heç bir dövlətin iradəsi ilə hesablaşmır: “Rusiya bəyanat verib ki, Ermənistanın Gömrük İttifaqına qəbul olunması, Dağlıq Qarabağ probleminin həllinə təsir etməyəcək. Təbii ki, bu, boş ritorikadan başqa bir şey deyil. Rusiya öz dediklərinə əməl etməyən və ya hər dediklərində ancaq öz mənfəətlərini düşünən ölkə kimi yenə də obyektivlik nümayiş etdirmədi. İndi ermənilər bir az da qabağa gedib qondarma "Dağlıq Qarabağ Respublikası"nın da Gömrük İttifaqına daxil olması ilə bağlı təklif irəli sürürlər. Daşnaksütyun Partiyası belə bir bəyanatla çıxış edib. Bu, onu göstərir ki, Rusiya nə Qazaxıstanın, nə də Qırğızıstanın iradəsi ilə hesablaşmır. Hətta Belarus prezidenti Lukaşenko da MDB dövlətlərinin zirvə toplantısında fikir bildirdi. Amma Rusiya post-sovet məkanında öz amirlik maraqlarından istifadə edərək, heç kimi nəzərə almadan sırf öz maraqlarına uyğun siyasəti həyata keçirmək istəyir. Etiraz edənləri də qeyri-real cavabları ilə susdurmağa çalışır.”

Politoloq təklif edir ki, Azərbaycan bu məsələni beynəlxalq təşkilatların gündəminə daşımalıdır: “Azərbaycan bu məsələdə təkidli olmalıdır. Bu məsələ tez-tez beynəlxalq təşkilatların gündəminə gətirilməlidir. Həmişə təkidli siyasət və cəsarət diplomatiyada çox mühüm rol oynayır. Həm də qərb ölkələri Rusiyanın post-sovet məkanında yeni qurum yaratmasının əleyhinədirlər. Hər hansı bir etiraz qərb dövlətlərinin Moskvaya qarşı səfərbər olmasına kömək ola bilər. Ermənistanın Gömrük İttifaqına qəbul olunması, beynəlxalq motivli məsələ kimi beynəlxalq təşkilatların gündəminə salınması Azərbaycan diplomatiyasının fəaliyyət istiqamətlərindən olmalıdır. Yalnız Rusiyaya etiraz etməklə məsələni həll etmək mümkün deyil. Konseptual proqram hazırlanıb ona müvafiq olaraq diplomatiya hərəkətə keçməlidir”.

SeymurANN.Az