Ermənistan sülh müqaviləsi ilə bağlı təkliflər aldığını bildirir

"Biz Azərbaycana münasibətlərin normallaşdırılması ilə bağlı təkliflərimizi və ya sülh müqaviləsi layihəsini təqdim etdik və yalnız bir gün əvvəl onların cavablarını aldıq”, - Mirzoyan bildirib.

O qeyd edib ki, müzakirələr davam edir və Ermənistan ən qısa zamanda konsensusa nail olmağa ümid edir.

 

Ermənistan XİN rəhbəri qeyd edib ki, beynəlxalq tərəfdaşların vasitəçilik səyləri də bu prosesdə mühüm rol oynaya bilər.

Mirzoyan həmçinin bəyan edib ki, İrəvan danışıqların davam etdirilməsi ilə bağlı razılaşmalara sadiqdir. O qeyd edib ki, oktyabrın əvvəlində Praqada keçirilən danışıqlarda Azərbaycan tərəfi ilə növbəti görüşün keçirilməsi barədə razılıq əldə olunub.

Təkliflər noyabrın 7-də iki ölkənin xarici işlər nazirlərinin Vaşinqtonda keçirilən görüşündə təqdim edilib. Noyabrın 25-də Ermənistan Xarici İşlər Nazirliyinin sözçüsü Vaan Hunanyan bəyan edib ki, İrəvan hələ də Bakıdan cavab almayıb.

 

Mirzoyan onu da vurğulayıb ki, Ermənistan üçtərəfli sazişlər və beynəlxalq hüquq çərçivəsində belə öhdəliklərin olmamasına baxmayaraq, əlində olan bütün mina sahələrinin xəritələrini birtərəfli qaydada Azərbaycana verib və bu xəritələrin deşifrə edilməsinə köməklik göstərməyə hazır olduğunu bildirib.

 

Rəsmi Bakı bu xəbərə hələ münasibət bildirməyib.