Ermənistanda azərbaycanlı hərbçiyə ömürlük həbs cəzası verilib- Erməni KİV

"Zəngəzur mis-molibden zavodunda mühafizəçini qətlə yetirməkdə təqsirləndirilən və 20 il müddətinə azadlıqdan məhrum edilən azərbaycanlı hərbçi Hüseyn Axundovun cəzası ağırlaşdırılaraq ömürlük həbslə əvəz edilib. Ermənistanın Apellyasiya Cinayət Məhkəməsi bununla bağlı mühafizəçi Ayrapet Meliksetyanın hüquqi varislərinin şikayətini təmin edib",- məlumatda qeyd olunub.

 

Hərbi ekspert Üzeyir Cəfərov bildirir ki, Hüseyn Axundovun məhkəməsi yekunlaşdığı və "cəzasını” çəkdiyi üçün ona ömürlük həbs verilə bilməz.
 
"Ermənistan mətbuatı çox şeyi yaza və deyə bilər. Hər erməni yazan fikirlərə dərhal reaksiya vermək lazım deyil. Onun üzərində məhkəmə bitib, barəsində hansısa şikayət verilməyib. Ömürlük cəza necə verə bilərlər? Bütün dünya onlara qarşı olar ki, ömürlük cəza verən idisə, araşdırıb vaxtında verərdilər. Onlar bu əməlləri ilə özlərini rüsvay edəcəklər ki, X məhkəmə düzgün araşdırma aparmayıb. Ermənistandan hər şey gözləmək mümkündür, amma bu cür rüsvayçılığa, biyabırçılığa getməz. Mətbuat yalnız Azərbaycan tərəfini qızışdırmaq üçün bu fikirləri səsləndirir. Onun məhkəməsi bitib və "cəzasını” çəkir. Ömürlük cəza niyə verilsin?”, - ekspert əlavə edib.
 

Bu ilin aprelin 17-də İrəvan məhkəməsi Azərbaycan əsgərləri Aqşin Bəbirov və Hüseyn Axundovun Ermənistanla sərhədi qanunsuz keçməsinə görə həbs edilməsinə qərar verib. 

 

Mayın 8-i Aqşin Bəbirov barəsində hökm çıxarılıb və o, 11 il 6 ay müddətinə azadlıqdan məhrum edilib. İyunun 21-i isə Hüseyn Axundov 20 il müddətinə azadlıqdan məhrum olunub.
 
Bundan əvvəl Ermənistan Müdafiə Nazirliyi bir azərbaycanlı hərbçinin aprelin 10-da, ikincisinin isə aprelin 13-də saxlanıldığını bildirib. Daha sonra Azərbaycan Müdafiə Nazirliyi bəyan edib ki, iki hərbçi itkin düşüb, onlar əlverişsiz hava şəraiti səbəbindən yolu itiriblər. 

Əsir və itkin düşmüş, girov götürülmüş vətəndaşlarla əlaqədar Dövlət Komissiyası itkin düşən iki Azərbaycan hərbçiləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlunun Ermənistanda olmasını ehtimal edərək onların azad olunmaları ilə bağlı aidiyyəti beynəlxalq təşkilatlara rəsmi müraciət edib. 
 
Daha sonra, Dövlət Komissiyası Ermənistanda əsirlərlə bağlı görüş keçirilib. Onların ailələri ilə əlaqə qurması üçün şərait yaradılıb.