Haaqa məhkəməsi Ukraynanın Rusiyaya qarşı iddiası üzrə dinləmələrə başlayıb

Haaqa Beynəlxalq Arbitraj Məhkəməsi  Ukraynanın Qara dəniz, Azov dənizi və Kerç boğazında sahilyanı dövlətlərin hüquqlarına dair Rusiyaya qarşı iddiası üzrə dinləmələrə başlayıb. Bu barədə RİA Novosti xəbər verib.

Məhkəmə Krım körpüsünün tikintisi zamanı Rusiyanın ekoloji standartlara əməl etməməsi ilə bağlı Ukraynanın iddialarına baxacaq. Bundan əlavə, strukturun Azov-Kerç akvatoriyasında gəmiçiliyə təsiri, eləcə də Krım sahillərində arxeoloji və tarixi yerlərin təhlükəsizliyi ilə bağlı suallar qaldırılacaq.

Dinləmələr oktyabrın 5-dək davam edəcək. Rusiya tərəfini Rusiya Xarici İşlər Nazirliyinin xüsusi təyinatlı səfiri Gennadi Kuzmin təmsil edəcək.

Ukrayna Rusiyaya qarşı arbitraj prosesini 2016-cı ildə başlayıb. O, BMT-nin Dəniz Hüququ Konvensiyasına uyğun olaraq həyata keçirilir. Kiyev iddiası ilə Qara dənizdə, Azov dənizində və Kerç boğazında Krıma bitişik dəniz zonalarında hüquqlarını möhkəmləndirmək istəyir.


www.anews.az