İyunun 6-da Prezidentin ictimai-siyasi məsələlər üzrə köməkçisi Əli Həsənov baş redaktorlarla keçirilən görüşdə mətbuatın inkişafında rolu olan jurnalistlərin mükafatlandırılacağını deyib. O, redaksiyalarda hazırlanacaq siyahının prezidentə təqdim ediləcəyini də bildirib.

"Yeni Müsavat” qəzetində hələ ki bu məsələ ilə bağlı yekun qərar, siyahı yoxdur. İlkin müzakirələr baş tutsa da, ad alacaq əməkdaşların siyahısı müəyyənləşməyib. Bu barədə qəzet rəhbərliyindən verilən məlumatda bildirilir. 

"Azadlıq” qəzetinin redaktoru Sücəddin Şərifov isə bildirdi ki, hələlik bu mövzuda redaksiya daxilində heç bir müzakirə olmayıb. Müsahibimizin sözlərinə görə, bu səbəbdən də konkret qərar yoxdur. "Siyahı göndərməmə, bu adlardan imtina etmə ehtimalınız varmı” sualına cavabda redaktor dedi ki, hər şey redaksiya heyətinin verəcəyi qərardan asılıdır: "Müzakirə apamamışıq. Ona görə də konkret heç nə deyə bilmərik”. 

"525-ci qəzetin” baş redaktoru Rəşad Məcid isə siyahının artıq müəyyənləşdiyini bildirib. Amma o, bu siyahını mətbuata açıqlamayacaqlarını, rəsmi qurumlara göndərəcəklərini deyib. 

Mətbuat Şurasının sədri Əflatun Amaşov isə mətbuatın 140 illik yubileyi münasibətilə mükafatlandırılmaya təqdim olunmaq üçün quruma 100-ə yaxın müraciətin daxil olduğunu deyir. Amma redaksiyalar və jurnalist təşkilatları əməkdaşlarının mükafatlandırılması ilə bağlı Prezident Administrasiyasına özləri də müraciət edə bilərlər. MŞ sədrinin sözlərinə görə, mükafatla bağlı müraciətlərin qəbul olunması iyul ayının ortalarına qədər davam edəcək. İyulun 20-nə qədər qaliblər müəyyənləşəcək. Milli Mətbuat Günündə -iyulun 22-də mükafatlandırma olacaq".

Xatırladaq ki, iyunun 2-də Prezident İlham Əliyev Azərbaycan milli mətbuatının 140 illik yubileyinin keçirilməsi haqqında sərəncam imzalayıb. Sərəncamla Prezident Administrasiyasına Azərbaycan Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu və Mətbuat Şurası ilə birlikdə Bakı şəhərində və respublikanın bölgələrində yubiley tədbirlərinin keçirilməsini təmin etmək, jurnalist təşkilatlarının və redaksiyaların təklifləri əsasında milli mətbuatın inkişafında xidmətləri olan jurnalistlərin mükafatlandırılması haqqında təklifləri bir ay müddətində prezidentə təqdim etmək tapşırılıb.