ANN.Az-ın məlumatına görə, yayılan bayram təbrikində deyilir ki, SSRİ-nin son günləri Azərbaycan türklərinin Arazın hər iki sahilində sərhəd yürüşü, dəmir tikanlı məftilləri qırması, özünü suya vurub öz doğma qardaş bacısına qovuşmaları, həftələrlə hər iki sahildə gecə-gündüz birləşmək şüarı, Arazın iki tərəfində olan hər iki Azərbaycanın əslində bir olduğunu, Azərbaycan türklərindən ibarət olduğunu dünyaya isbatladı. Təəssüf ki, o zamandan birləşmək istəyi hələ də gerçəkdə öz əksini tapa bilmədi.

 

Əsası 1989-cu il dekabrın axırlarında sərhədlərin dağılması zamanı qoyulduğu, 1991-ci ilin 16 dekabrında Naxçıvan Muxtar Respublikası Ali Məclisinin sədri, mərhum Heydər Əliyevin qərarı ilə bayram kimi qeyd olunan Dünya Azərbaycanlılarının Həmrəylik Günü, 40 milyona yaxın Güney Azərbaycan türkünə və ümumyyətlə 60 milyona yaxın dünya azərbaycanlılarına bir mesaj idi. Həmrəylik günü hər bir azərbaycanlı üçün həmin birləşmək istəyinin simvolik nişanəsidır.

Quzey Azərbaycan türkləri Dağlıq Qarabağ itkisi ilə öz müstəqilliyini bərpa etsə də, Güney Azərbaycan türkləri hələ də öz haqq və hüquqlarını əldə edə bilməmişdir. İrəvanda, Zəngəzurda rus-erməni assimilyasiyası nəticəsində bir nəfər belə türk qalmamışdır. Borçalı və Dərbənddə Azərbaycan türklərinin sayı hər il azalmaqda davam edir. Bu baxımdan, dünya azərbaycanlılarının yeni ildə yalnız sözdə deyil, həm də fikirdə və işdə həmrəy olmaları çox vacibdir.

 

Yeni Nəfəs Hərəkatı təşkilat komitəsi olaraq 60 milyondan yuxarı dünya azərbaycanlılarını bir daha təbrik edir, milli birlik yolunda uğur arzulayırıq. Tanrı millətimizi və dövlətimizi qorusun!