Azərbaycan hökuməti ölkənin ən böyük bankı olan Azərbaycan Beynəlxalq Bankını (ABB) özəlləşdirməyi planlaşdırmır. Bunu Azərbaycan İnvestisiya Holdinqinin İdarə Heyətinin sədri Mətin Eynullayev deyib.
ABB 2021-ci ildə Azərbaycan İnvestisiya Holdinqinin idarəçiliyinə verilib.
"Hazırda Beynəlxalq bank mənfəətlə işləyir. Ona görə də biz onun özəlləşdirilməsini məqsədəuyğun hesab etmirik və bu məsələ bu gün gündəmdə deyil”, - Eynullayev cümə axşamı keçirilən mətbuat konfransında bildirib.
ABB 2022-ci ili 254 milyon 379,52 min manat xalis mənfəətlə başa vurub (2021-ci illə müqayisədə 21,8% artım).
ABB 1992-ci ildə yaradılıb və ölkənin ən böyük bankıdır. Bankın səhmdarları 1763 hüquqi və fiziki şəxsdir. Səhmlərin 96,37%-i dövlətə məxsusdur.
Bankın kapitalında Azərbaycan Maliyyə Nazirliyinin payı 92,56%, Əmlak Məsələləri Dövlət Xidmətinin payı 3,81% təşkil edir. Bundan əlavə, bankın kapitalının 3,06%-i fiziki şəxslərə - minoritar səhmdarlara, 0,23%-i "Aqrakredit” QSC-yə, 0,34%-i digər hüquqi şəxslərə məxsusdur.
N.Təbrizli
www.anews.az
Bizi sosial şəbəkələrdə izləyin !
